Маңғыстаулық мемлекеттік қызметшілер жаңа жылдық корпоративтен бас тартты

Маңғыстаулық мемлекеттік мекеме басшылары мен қызметкерлері, жаңа жылдық корпоративті тойлаудан бас тартты. Олар мереке қарсаңында әріптестерімен бас қосуға жиналатын қаржыны қайырымдылық қорларына аударса, енді бірі ұжым көмекке мұқтаж жандарға қол созды. Бұл туралы Маңғыстау облысының қоғамдық коммуникация орталығы хабарлады.

Мәселен, Маңғыстау ауданына қарасты 12 ауылдың әкімдік қызметкерлері 500 мың теңге жинап, әлеуметтік жағынан аз қамтылған отбасыларға азық-түлік пен жаңа-жылдық сыйлық үлестірді.

Сондай-ақ 6 баласы бар арбада отырған анаға қолдау көрсетіп, қаржылай көмек берді. Қарақия ауданының мемлекеттік қызметкерлері 631 мың теңге көлемінде қаржы жинап, қайырымдылыққа аударды.

Қайырымдылық эстафетасын Маңғыстау облысындағы мәдениет, тілдерді дамыту және архив ісі басқармасы жалғады. Ұжым облыстық орталық «Бекет ата» мешітіне 100 мыңға жуық қаржы аударған. Бұдан бөлек, Маңғыстау облысының Қаржы басқармасы, Кәсіпкерлік және сауда басқармасы, Инвестициялар және туризмді дамыту басқармасы, Энергетика және тұрғын үй-коммуналдық шаруашылық басқармасы «Мы люди мы вместе» қайырмдылық қорына 1 күндік жалақыларын аударды. "Жақсының жақсылығын айт нұры тасысын" демекші Маңғыстау облысы әкімінің жанындағы әйелдер істері және отбасылық- демографиялық саясат жөніндегі комиссия мүшелері «30 игі іс» республикалық акциясын жалғастыруда. Олар тұрмысы төмен отбасыларға ас үй жиһаздары мен кереует алып көмектессе, тағы 20 отбасыға азық-түлік жеткізді.

Қала, аудан әкімдіктері тұрмысы төмен отбасылар мен ата-анасының қамқорлығынсыз қалған балаларға жаңа жылдық сыйлықтар үлестірді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.