Бүгін «Ұлы дала жорығы» марафон-бәйгесінің «Рекорд» құрамасында бақ сынап жатқан маңғыстаулық шабандоз мәре сызығына бірінші келді, - деп хабарлайды mangystaumedia.kz сайты.
Астанадан Түркістанға дейінгі 1300 шақырымды бастан-аяқ 1 атпен еңсеруді мақсат еткен Маңғыстау облысының жылқысы 1250 шақырымды 97 сағат 10 минут 38 секундта бағындырды. Ал Жетісу облысының тұлпары 98 сағат 28 минут 35 секундта еңсерді. Үшінші келген астаналық сәйгүліктің уақыты - 101 сағат 33 минут 18 секунд.
Еске салайық, Маңғыстаудың "Көкмойнақ" командасы 12-кезеңге келгенде жорықты тоқтатқан болатын. Дегенмен маңғыстаудың аты "Шағырайторы" қазақ жылқысының атын Гиннес рекордтар кітабына енгізу жолында сынға түсуде. Енді ертең шешуші кезеңде "Шағырайторы" топ бастап, бірінші келсе, рекорд болады.
Төрешілердің шешімімен «Рекорд» құрамасында жеңіске жеткен шабандозға 2 миллион теңге, 2-орынға – 1,5 миллион теңге, 3-орынға – 1 миллион теңге беріледі.
Ертең жорықтың соңғы күні. Шабандоздар таңғы сағат 7:00-ден бастап соңғы межені еңсеруге аттанады. Содан соң ертең 1 300 шақырымдық марафон-бәйге жеңімпаздарының есімі «Түркістан-арена» стадионында белгілі болады. Марапаттау рәсімі кешкі сағат 18:30-ға жоспарланған.
Жұлдызай ҚАЛИЕВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
