Қазақстан спортшысы Париж Олимпиадасында күміс жүлдеге қол жеткізді

© Olympic.kz

Қазақстандық Нариман Курбанов Париж олимпиадасының күміс жүлдегері атанды, деп хабарлайды mangystaumedia.kz.

Отандасымыз Париж Олимпиадасында спорттық гимнастиканың ат снарядындағы жаттығуда күміс жүлдеге қол жеткізіп отыр. Ол ақтық сында 15.443 ұпай жинады. Осылайша, Нариман елімізге спорттық гимнастикадан Олимпиаданың алғашқы медалін сыйлады. Ал бұл сында алтын медаль Ирландия спортшысына бұйырды.

«Спорттық гимнастикадан ұлттық құрама көшбасшысын Қазақстан қоржынына күміс жүлде салғанымен шын жүректен құттықтаймын! Лайықты түрде жеңіске жетті. Қазақстан құрамасы үшін өте қуаныштымын және осы жүлдеге сүбелі үлес қосқан барлық маманға, жаттықтырушыларға алғыс айтамын. Осы орайда Нариманның жоғары кәсібилігін ерекше атап өткім келеді. Спортшымызға жанкүйерлер үлкен сенім артты, одан медаль күтті. Ал Нариман Құрбанов жанкүйерлердің үмітін ақтап, Қазақстан қоржынына күміс жүлдені салды. Бұл медаль – осы күнге дейін төгілген тер мен еселі еңбектің өтеуі деп білемін. Қазақстандық спортшылар әлемдік аренада кәсіби шеберлігін көрсетіп жатыр деп мақтанышпен айта аламыз. Бұл – Олимпиададағы соңғы жүлдеміз емес екеніне, әлі де Көк туымыз көкте желбірейтініне сенімдімін. Барлығына алғыс айта отырып, Нариманды күміс жүлдесімен тағы бір мәрте құттықтаймын!», - деді Туризм және спорт министрі Ермек Маржықпаев.

Бүгін бокстан әйелдер арасында тағы бір отандасымыз Назым Қызайбай 50 келіде жартылай финалға шықты. Ол өзін Олимпиада жүлдесімен қамтып қана қоймай, енді финалдық сынға өту үшін жекпе-жекке шығады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.