Ресейлік журналист Жаңаөзен теміржол станциясының атауына шүйлікті

Ресейлік журналист Тина Канделаки өзінің Telegram-парақшасында Қазақстанда орыс тілінің қолданылу аясы тым шектеліп жатқанын жазған. Ол «Уральск» атауының – «Орал», «Узень» атауының – «Жаңаөзен» деп өзгеруі күмән тудыратын шешім екенін алға тартты, деп хабарлайды mangystaumedia.kz сайты El.kz ақпарат агенттігіне сілтеме жасап.

Оның бұл пікіріне қазақстандық тележүргізуші Динара Сәтжан жауап қатты.

Қымбатты Тина! Біріншіден, біз тәуелсіз мемлекетпіз. «Есіктен кіріп, төр менікі деме» деген мақал бар. Сондықтан теміржол станцияларына қандай атау беретінімізді өзіміз шешеміз. Екіншіден, Қазақстан егемен жылдарында кеңестік биліктің салдарынан жоғалтып алған ана тілін қайтарып жатыр. Үшіншіден, орыс тілі – ұлтаралық қарым-қатынасқа арналған ресми тіл, ал қазақ тілі – мемлекеттік тіл. Бұл Конституцияда көрсетілген, - деді Сәтжан.

Отандық тележүргізуші теміржол станцияларына тарихи атаулары қайтарылып жатқанын еске салды.

Бұл жерде орыс тілінің қолданылу аясын шектеу дегеннің қатысы қанша? Біз өз елімізде мемлекеттік тілден бөлек орыс және ағылшын тілдерінде де сөйлейміз. Біздің күшіміз осыда! – деп жазды Динара Сәтжан.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.