БҰҰ-ның сарапшысы: Жұмыстарыңызды барлығына үлгі етуге болады

Бұл туралы «Азаматтарға арналған үкімет» мемлекеттік корпорациясының промо-ХҚО-сы мен ахуалдық орталығында болған халықаралық сарапшы, БҰҰ электрондық үкімет басқармасының басшысы Акуаро Винченсо мәлімдеді.

«Сіздің цифрлық үкіметіңіз – мақтанарлық дүние, жұмыстарыңызды барлығына үлгі етуге болады, тіпті өзге елдер үшін Қазақстанда цифрлық саясаттың қалай жасалып жатқаны және қызметтердің қалай ұсынылатыны жайлы турлар ұйымдастыруға болады. Цифрлық қызметтердің дамуы туралы айта келе, Қазақстан болашағы зор ел деп айта аламын», – деді халықаралық сарапшы.

Мемлекеттік корпорацияның басқарма төрайымы Әсемгүл Балташева Азаматтарға арналған үкіметтің жұмысын таныстыру барысында Қазақстанда мемлекеттік қызметтерді автоматтандыру және оңтайландыру үрдісі туралы айтып берді.

Винченсо мырза, сондай-ақ қазақстандықтардың мемлекеттік қызметтерді ХҚО және оның онлайн баламасы – egov.kz порталы арқылы қалай алатынын білді. Қонақ мемлекеттік корпорацияның қызметіне жоғары баға беріп, Қазақстанның мемлекеттік қызмет көрсету моделін басқа елдерге де пайдалануға болатынын атап өтті.

Акуаро Винченсо Қазақстан e-үкімет рейтингісінде жоғары позицияға ие болғанын және цифрлық үкімет пен инновациялар бойынша әлемдегі көшбасшылардың бірі болуға лайық екенін атап өтті.

Айта кетейік, мәртебелі қонақ Қазақстанға Алматы қаласында өтіп жатқан Digital Almaty 2020 форумы аясында келді. Шара барысында жасанды интеллект ролі, цифрлық трансформация мен білім саласындағы ілкімді технологиялар сияқты тақырыптар талқыланатын болады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.