Қазақстанда жүргізуші куәлігін көрсету міндетті болмайды - заң жобасы

Парамент Мәжілісінің жалпы отырысында палата депутаттары «Қазақстан Республикасының кейбір заңнамалық актілеріне жол жүрісі мәселелері бойынша өзгерістер мен толықтырулар енгізу туралы» заң жобасы екінші оқылымда мақұлданды, деп хабарлайды mangystaumedia.kz сайты ҚазАқпарат тілшісіне сілтеме жасап.

Заң жобасында жүргізушілердің Қазақстан Республикасында берілген жүргізуші куәлігі мен көлік құралына тіркеу құжаттарын өзімен бірге алып жүрмегені үшін әкімшілік жауапкершілікті алып тастауды қарастырып отыр. Алайда жүргізушілер өзімен бірге жеке куәлігін алып жүруге мндетті болады. Бұл түзетулер шетел жүргізушілері мен шетелдік көлік құралдарына қолданылмайды.

«Жол жүрісі қауіпсіздігін күшейту мақсатында заң жобасында 2022 жылдан бастап аталған норманы қолданысқа енгізе отырып, 10 жылдан асқан автобустарды бастапқы тіркеуге тыйым салым арқылы оларды пайдалану мерзімі бойынша шектеу енгізу көзделіп отыр», - деді Мәжіліс депутаты Магеррам Магеррамов.

Бұл ретте бұрын Қазақстанда тіркелген және жолаушыларды, оның ішінде ауылдық жерлерде жолаушыларды тасымалдау үшін пайдаланылатын автобустарды пайдалану шектелмейді.

Осы норманы енгізу жолаушыларды тасымалдау қауіпсіздігін арттыруға мүмкіндік береді, сондай-ақ қолданыстағы автобустар паркін біртіндеп жаңарту есебінен, тұтастай алғанда, экологиялық жағдайға оң әсер етеді.

Бұдан бұрын хабарланғандай, өткен аптада Мәжілістің жалпы отырысында «Қазақстан Республикасының кейбір заңнамалық актілеріне жол жүрісі мәселелері бойынша өзгерістер мен толықтырулар енгізу туралы» заң жобасы бірінші оқылымда мақұлданған болатын.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.