АСЕАН елдері Транскаспий халықаралық сауда жолына қызығушылық танытып отыр

Бүгін Ақтауда Таиланд, Вьетнам және Индонезияның Қазақстандағы елшілері, Ақтау және Құрық теңіз порттары өкілдері мен Маңғыстау облысы әкімдігінің қатысуымен жиын өтті. Жиын Таиланд елшілігінің бастамасымен Оңтүстік-Шығыс Азия елдері қауымдастығы (АСЕАН) елдерінің Қазақстан арқылы Еуропа, Орталық Азия елдеріне жаңа транзиттік дәліздерді құру мен дамытуға қатысу перспективаларын талқылау мақсатында ұйымдастырылды, - деп хабарлайды mangystaumedia.kz сайты.

Семинар барысында Ақтау және Құрық теңіз порттарының өкілдері Қазақстанның негізгі теңіз қақпаларының көліктік-логистикалық дамуы бойынша жобаларға инвестиция салу мүмкіндіктері мен перспективалары туралы айтты.

Таиландтың Қазақстандағы Елшісі Чатчаван Сакорнсин айтуынша, бүгінде АСЕАН елдері балама сауда жолдарын іздеуде.

-АСЕАН елдерінің Қазақстаннан және Орталық Азияның басқа елдерінен географиялық қашықтығына байланысты логистика сауда-экономикалық қатынастарды анықтайтын негізгі фактордың бірі. Геосаяси және геоэкономикалық жағдайға байланысты Таиландтан жүк тасымалдаудың жаңа баламалы жолдарын іздестірудеміз. Бәрін Транссібір жолы арқылы тасымалдайтынбыз. Қараша айында әлемнің түкпір-түкпірінен келген Тайланд елшілерінің кездесуінде Таиландтан Қазақстанға және одан әрі Еуропаға тауар жеткізудің жаңа бағыты ретінде Транскаспий халықаралық сауда жолының тартымдылығы талқыланды. Біз үшін Қазақстан үлкен қызығушылық тудырады, өйткені ол Орталық Азия аймағында көшбасшы, ал Таиланд, Вьетнам және Индонезия АСЕАН елдерінің орталығы. Көлік және логистика саласында ғана емес, әсіресе туризм саласында да ортақ тұстарымыз көп. 2024 жылдың соңында Қазақстаннан Таиландқа шамамен 250 мың турист келеді деп күтеміз. Барлығы визасыз келісімнің арқасында. Турист ретінде мен еліңізде туризмді қалай дамыту керектігі туралы білім алмасуға болатынын байқап отырмын. Таиландтың Қазақстандағы Елшісі ретінде сауда-экономикалық және туристік бағыттарды дамытуға ғана емес, екі халық арасындағы қарым-қатынасты нығайтуға да назар аударғым келеді», - деді Таиланд Корольдігінің Қазақстандағы Төтенше және Өкілетті Елшісі Чатчаван Сакорнсин.

Кездесу барысында АСЕАН өкілдері сингапурлық компаниялардың Құрық портын дамытуға инвестиция салу мүмкіндігіне қызығушылық танытты.

– Құрық порты Транскаспий халықаралық көлік бағыты аясында жұмыс істей алады. Бұл бізге Орталық Азия елдерімен ғана емес, болашақта АСЕАН мемлекеттеріне жүк ағынын арттыруға мүмкіндік береді. Оңтүстік-Шығыс Азия елдері қауымдастығын тарту Қазақстанның көлік-логистикалық әлеуетін арттыруға мүмкіндік береді, - дейді «Порт Құрық» ЖШС маркетинг секторының меңгерушісі Айтқали Нұрмағанбетов.

Индонезияның Қазақстан Республикасындағы Елшісі Мохамад Фаджрул Рахманның айтуынша, Қазақстанмен АСЕАН ынтымақтастығының қарқынды дамуы өзара өсу мен өркендеу үшін орасан зор әлеуетке ие.

– Қазақстан мен Индонезия арасындағы сауда белсенді. 2022 жылдың қорытындысы бойынша екі ел арасындағы тауар айналымы 700 миллион АҚШ доллары болған. Ал АСЕАН елдерімен бұл көрсеткіш Сингапур, Таиланд, Вьетнам, Малайзия және Индонезия мемлекеттерін қосқанда 4,5 миллиард долларға жетті. Индонезиядан Қазақстанға негізінен болатты нығайту үшін қолданылатын құрамдас бөліктер әкелінеді, Қазақстаннан химиялық өңдеу өнімдері, мұнай және мұнай өнімдері экспортталады», - деді Индонезия Республикасының Қазақстандағы және Тәжікстандағы Елшісі Мохамад Фаджрул Рахман мырза.

Кездесу қорытындысы бойынша тараптар Қазақстан мен АСЕАН елдері арасында логистиканы құру бойынша нақты шараларды талқылау үшін ауқымды диалог алаңын ұйымдастыруға келісті.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.