Ақтауда блок-модульді қазандықтар орнатылады

Бүгін, 2 қаңтарда аймақ басшысы Нұрлан Ноғаев Ақтау қаласындағы блок-модульдік қазандықтарды орнату жұмыстарымен танысты, деп хабарлайды mangystaumedia.kz Маңғыстау облысы әкімінің баспасөз қызметіне сілтеме жасап.

Ақтау қаласын жылумен қамту мәселелерін уақтылы шешу үшін облыс әкімдігі қуаттылығы 39 Гкал/сағ (45 МВт) болатын блок-модульдік қазандықтар – 9 бірлік сатып алуға және орнатуға облыс әкімдігінен қаражат бөлінген болатын.

– Бірнеше жылдан бері қалада «МАЭК-Қазатомөнеркәсіп» компаниясынан жеткізілетін жылу энергиясы тапшылығы сезілуде. Яғни, қуат жеткіліксіз, сондықтан бұл мәселені қандай да бір жолмен шешу үшін біз қуаттылығы 5 мегаватт болатын модульдік қазандықтарды сатып алып, жылу тапшылығы бар жерде орнатуды шештік. Өткен жылы 5 қондырғы сатып алынды, – дейді «Каспий жылу су арнасы» бас инженері Асқар Дүзмағамбетов.

Бірінші кезекте 4 шағын ауданда (13, 15, 28а және 33) 5 блок-модульдік қазандық орнатылады. Бүгінгі күні 2 қазандық іске қосылды (28а шағын ауданы – 1, 2, 3, 4, 5, 23 үйлер, 1 балабақша. 33 шағын аудан – 30, 31, 32 үйлер, «Маңғыстау арена» ғимараты және мешіт).
Екінші кезеңде 3 шағын ауданда (19, 19а және 32а) 4 блок-модульдік қазандық орнатылады. Сондай-ақ 27 желтоқсанда 17-шағын аудандағы қолданыстағы қазандықты жаңғырту жұмыстары аяқталды. Газ құбыры қосылғаннан кейін қазандық іске қосылады. Қазандықтарды орнату нәтижесінде 50-ге жуық көппәтерлі тұрғын үйлер үздіксіз және сапалы жылумен қамтамасыз етіледі.

Нысандарды аралау қорытындысы бойынша Нұрлан Ноғаев жауапты тұлғаларға бірқатар нақты тапсырмалар берді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.