Маңғыстау облысының әкімі чемпион Бекзад Нұрдәулетовке пәтер кілтін табыстады

Бүгін, 24 қыркүйек күні бокстан әлем чемпионы Бекзад Нұрдәулетовті облыс әкімі Серікбай Трұмов қабылдап, Ақтау қаласындағы 2 бөлмелі пәтердің кілтін табыстады, - деп хабарлайды mangystaumedia.kz сайтының тілшісі. Жиында аймақ басшысы Серікбай Трұмов ҚР Президентінің жолдаған құттықтау хатын оқып, қуанышын жеткізді. «Құрметті Бекзад, Екатеринбург қаласында өткен бокстан әлем чемпионатының жеңімпазы болуыңмен құттықтаймын. Жаһандық додада мықты қарсыластардың барлығын жолдан тайдырып, барша қазақстандықты зор қуанышқа бөледің. Алдағы әлемдік жарыстарда еліміздің мерейін өсіріп, мәртебесін асқақтата беруіңе тілектестігімді білдіремін. Өзіңе мықты денсаулық, бақыт және жарқын жеңістер тілеймін» делінген Президент хатында. Сондай-ақ, былғары қолғап шеберін бәйгеге қосқан бапкерлерінің еңбегі ескеріліп, оларға ерекше құрмет көрсетілді. Өңір басшысы боксшының алғашқы бапкері Батырбек Жайлыбаевқа 3 миллион және қазіргі бапкері Марат Жәкиевке 5 миллион теңге қаржылай сыйақыны табыс етті. «Әлем чемпионатында алтын алқа таққан Бекзад бауырымыз ортамызға оралды. Күні кеше үлкен салтанатпен күтіп алдық. Абыройымызды асқақтатып, мерейімізді өсірген жеңісі баршамызға құтты болсын! Бекзадқа тек сәттілік тілейміз. Алдағы уақытта Токиода өтетін байрақты бәйгеде көк туымызды желбіретсе деген тілек бар», - деді МО әкімі Серікбай Трұмов. Жиналған жұртшылық әлемдік рингте 81 келі салмақта жұдырықтасқан боксшыны тағы бір мәрте құттықтап, айрықша ықылас білдірді. Сонымен қоса, еңбек ардагері, ақсақал Сақып Керелбаев Бекзад Нұрдәулетовке  жүрекжарды тілегін айтып, ақ батасын берді. Одан бөлек, чемпионның бапкері облыс әкіміне «Бокс қауымдастығының» атынан әлем чемпионатынан естелік ретінде былғары қолғапты тарту етті. Туған жерге жеңісімен табан тіреген спортшы өзін қолдаған жұртшылыққа алғысын білдірді: «Еңбегімізді бағалап, кеше әуежайдан қарсы алып, бүгін осында шақырып марапаттап жатқан облыс әкімшілігіне ризамын. Спортшыларға көңіл бөліп жатқандарына алғысымды білдіремін. Жеңісіме қуанып, әуежайдан күтіп алған жанкүйерлерге де рақмет. Ел үмітін ақтау үшін әлі де еңбек етеміз», - деді бокстан әлем чемпионы Бекзад Нұрдәулетов.

Махаббат НҰРЖАНҚЫЗЫ

Суреттерді түсірген Талант ҚҰСАЙЫН

[gallery td_select_gallery_slide="slide" ids="85653,85654,85655,85652,85647,85645,85657,85648,85649,85650,85646,85651"]