Мұнайлыда есірткі сатқан полиция инспекторына қатысты сот үкімі шықты

Мұнайлы аудандық соты аудандық Полиция бөлімінде көшпелі сот отырысын өткізіп, полиция капитаны Б.А-ға қатысты іс бойынша үкім жариялады. Бұл туралы Мұнайлы аудандық сотының баспасөз қызметі хабарлады.

Сот мәжілісі аудандық Полиция бөлімі қызметкерлерінің қатысуымен өтті.

Сотта анықталғандай, ПБ учаскелік инспекторы Б.А. 2020 жылы маусым-тамыз аралығында есірткі және психотроптық заттарды өткізу мақсатында заңсыз тасымалдау және өткізуді ойластырған. Өз ойын іске асыру үшін танысына 2 дана сіріңке қорапшасына салынған, салмағы 6,65 грамм «марихуана» есірткі затын сатқан.

Мемлекеттік айыптаушы сотқа берілген айыптауларды толық қуаттап, сотталушыға ҚР ҚК-нің 297-бабының 1-бөлігімен 7 жылға бас бостандығынан айыру жазасын тағайындауды сұрады.

Қорғану тарапы – сотталушыға тағылған айыптар дәлелденбейтіні жөніндегі уәждерін келтіріп, оны ақтауды сұрады. Сотталушы қорғаушының уәждерін қолдады.

Сот шешімімен сотталушының жасаған әрекеті сот тергеуінде жан-жақты, толық және объективті түрде зерттелген материалдармен дәлелденді. Сотталушыға жаза тағайындау барысында қылмыстық жауаптылығы мен жазасын жеңілдететін мән-жайлары ретінде бұрын сотталмағандығы мен кәмелетке толмаған 3 баласының бары ескерілді.

Сот үкімімен Б.А. ҚР ҚК-нің 297-бабының 1-бөлігімен кінәлі деп танылып, оған мемлекеттік қызметте лауазымдарды атқаруға өмір бойына тыйым салумен бірге, 5 жылға бас бостандығынан айыру және ҚР ҚК-нің 49-бабының 1 бөлігіне сәйкес, «полиция капитаны» арнаулы шенінен айыру жазасы тағайындалды.

Сот үкімі заңды күшіне енген жоқ.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.