Маңғыстау облыстық ауруханасының дәрігер-кардиологы Сержан Хасанов өкпе қабынуымен түсіп жатқан науқастар саны аз емес екенін айтты, деп хабарлайды mangystaumedia.kz.
"Науқастар көп жағдайда жедел жәрдемнің көмегімен, кейде өздері келеді. Компьютерлік томографияның және рентген қорытындысына сәйкес ем-дом тағайындалады. Қабылдау бөлімінде науқастың жағдайы ескеріледі. Атап айтқанда клиникалық көрінісі, температурасы жоғарыласа, ентігіп дем жетіспеген жағдайда нормативтерге сәйкес стационарға жатқызу немесе үйіне қайтару туралы шешім қабылданады" деді ол.
Сонымен қатар ол қазіргі уақытта келушілер бұрынғыша ауруханаға емін-еркін кіріп шыға алмайтынын ескертті.
"Науқастардың туыстарына стационарға келмеуге кеңес береміз. Анықтама бюросы бар, ол жерде барлық бөлімшелердің телефон нөмірлері көрсетілген. Кез келген сұрақ бойынша хабарласуға болады. Науқастарға үш мезгіл тамағы берілуде, дәрі-дәрмектер жеткілікті. Волонтерлар көмегін тигізіп жатыр. Ауруды асқындырып алмау маңызды, ол үшін емханаға уақытында қаралған абзал. Сондай-ақ, өз еркімен ем жүргізбеген дұрыс. Маңғыстаулықтарды карантин режимін сақтауға шақырамын және дерт айтып келмейді, осыны естен шығармаған абзал», - дейді дәрігер.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
