Науқастың үйіне барып, коронавирусқа тест алатын мобильді бригадалардың қызмет құны қанша

Денсаулық сақтау вице-министрі Ажар Ғиният көшпелі мобильді бригадалардың ақылы қызмет құнын атады, деп хабарлайды ҚазАқпарат.

«Министр мырза айтып кеткендей, емханаларда және жедел жәрдем қызметінде мобильді бригадалар құрылады. Олар қазіргі таңда жұмысын бастап кетті. Тарифі әзірленді. Құны – 5400 теңге», - деді ол ОКҚ-дағы баспасөз мәслихатында.

Вице-министрдің айтуынша, КВИ немесе ЖРВИ белгісі бар адамдар жедел жәрдем шақырса, мобильді бригадалар дәрігерлермен бірге барып, сол жерде тест алады.

«Шақыруға төленіп отырады. Бұл бригада бір адамға екі-үш рет келмейді. Өйткені тест бір-ақ рет алынып, КВИ бар ма, жоқ па - анықталып, учаскелік дәрігерге ақпарат беріледі», - деді ол.

Еске сала кетсек, бұдан бұрынғы баспасөз мәслихатында Денсаулық сақтау министрі Алексей Цой Қазақстанда коронавирусты жеңіл және симптомсыз көтеретін адамдарға көшпелі бригадалар ақылы қызмет көрсететінін хабарлаған болатын.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.