Қарт майдангерге – ерекше құрмет

Бүгін Ұлы Жеңістің 75 жылдығы қарсаңында «Nur Otan» партиясы Маңғыстау облыстық филиалы төрағасының бірінші орынбасары Елубай Әбілов, Маңғыстау облыстық мәслихатының хатшысы Нұри Тумышев, облыстық ардагерлер кеңесінің төрағасы Серікбай Төлетов және Маңғыстау облыстық қорғаныс істері жөніндегі департаментінің басшысы, полковник Мақсат Тастанов Ұлы Отан соғысының ардагері Бисен Боқаевтың үйіне арнайы барып, Жеңіс күнімен құттықтады.

Ардагерге Елубай Әбілов «Nur Otan» партиясы Төрағасының Бірінші орынбасары Бауыржан Байбектің атынан құттықтау ашық хатын табыстады. Ашық хатта «Сізді Ұлы Жеңістің 75 жылдық мерейтойымен шын жүректен құттықтаймын! Адамзат баласына зор қасірет әкелген сұрапыл соғысқа тойтарыс беріп, бейбіт өмірге жол ашқан өздеріңіздей ардагерлеріміздің асқан ерлігі мен ерен еңбегі ешқашан ұмытылмақ емес. Жыл өткен сайын жаңғырып, тағлымды даңқы арта береді. Ерлігі-аңызға, өмірі – өнегеге айналған Сіздер қандай құрметке болсын лайықсыздар. Елбасы, «Nur Otan» партиясы Төрағасы Нұрсұлтан Назарбаев Ұлы Жеңістің қаһармандары мен ардагерлерінің, тыл еңбеккерлерінің қоғамдағы ролін айшықтап, оларға лайықты құрмет көрсету керектігін ұдайы айтып келеді. Бүгінгі ұрпақ бойындағы отансүйгіштік пен еңбекқорлық секілді ізгі қасиеттер – осынау сұрапыл кезеңде ел тірегі болған аға буынның үлгі-өнегесі мен тәлім-тәрбиесінің жемісі. Сізді даңқты мерекемен құттықтай отырып, отбасыңызға амандық, деніңізге саулық, сарқылмас күш-қуат тілеймін!»- делінген. Сонымен қатар «Nur Otan» партиясы Маңғыстау облыстық филиалының төрағасы, аймақ басшысы Серікбай Трұмовтың атынан қарт майдангерді Ұлы Жеңістің 75 жылдығымен құттықтады. Одан кейін ардагерге азық-түлік себеті берілді. Бейбіт өмір сыйлаған ардагерлердің ерліктерін партия ешқашан назардан тыс қалдырмайды. «Ардагерлерді ардақтайық» партиялық жобасы аясында әрқашанда майдангерлерге көмек көрсетіп, қамқор болатынын жеткізген Елубай Әбілов, сұрапыл соғыстағы майдангердің көрсеткен жаужүрек ерліктеріне бүгінгі ұрпақ бас иетінін айта отырып, нұротандықтар атынан алғысын білдірді.

Нұри Тумышев қарт майдангерді Ұлы Жеңістің 75 жылдығымен құттықтап, облыстық мәслихат депутаттар атынан өз алғысын білдірді. Маңғыстау облыстық қорғаныс істері жөніндегі департаментінің басшысы, полковник Мақсат Тастанов мереке қарсаңында ардагерге «Ұлы Жеңіске 75 жыл» медалі мен Алғыс хат табыс етті. Серікбай Төлетов қарт майдангерді облыстық ардагерлер кеңесінің атынан құттықтады.

Ардагер Бисен Боқаев елдің амандығын, ұрпақтардың бейбіт елде өмір сүргенін тілеп, алғысын білдіріп, ақ батасын берді.

Бүгінгі күні Маңғыстау өңірінде 11 Ұлы Отан соғысының ардагері бар. Солардың бірі, Ұлы Отан соғысының ардагері Боқаев Бисен әскер қатарына 1942 жылы шақырылып, 1944 жылы 2-украина майданындағы соғыс қимылдарына, Яссы-Кишинев операциясына, Бессарабияны және Румынияны азат етуге қатысқан. «Қызыл Жұлдыз», 2-дәрежелі «Отан соғысы», «Жауынгерлік еңбегі үшін» медалімен марапатталған. Бүгінде қарт майдангер Ақтау қаласында немере-шөберелерінің ортасында әулетінің мәуелі бәйтерегі болып отыр.

Өңірдегі 11 Ұлы Отан соғысының ардагерлеріне жергілікті бюджеттен 1 млн теңге берілді. Сонымен қатар Ұлы Отан соғысының ардагерлері мен мүгедектеріне теңестірілген 1946 адамға 40 пен 60 айлық есептік көрсеткіш аралығында жергілікті бюджеттен әлеуметтік көмек төленді.

Голрох ЖЕМЕНЕЙ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.