Маңғыстауда Атырау облысынан эвакуацияланған тұрғындарға қандай медициналық көмек көрсетіледі?

Су тасқыны жағдайына байланысты Маңғыстау облысына Атырау облысынан 20 мыңнан астам адам эвакуацияланды. Олардың арасында жүкті әйелдер, балалар, тұрақты тіркелген жері бойынша диспансерлік есепте тұрған созылмалы аурулары бар яғни медициналық көмекке мұқтаж жандар баршылық. Маңғыстау дәрігерлері атыраулықтарға қалай көмек көрсетіп жатқаны туралы Маңғыстау облыстық денсаулық сақтау басқармасының басшысы Бекболат Ізбасаровпен әңгімелестік, деп хабарлайды mangystaumedia.kz.

- Бекболат Оразбайұлы, Атырау облысынан эвакуацияланған тұрғындар қандай медициналық көмек алуға мүмкіндігі бар?

- Көршілес Атырау облысындағы су тасқынына байланысты Маңғыстауға 20 мыңнан астам адам эвакуацияланған. Осыған байланысты Ақтауда 24 эвакуациялық пункт ашылды. Олардың әрқайсысында медициналық пункт жұмыс істеп тұр. Мұнда медицина қызметкерлері алғашқы медициналық-санитарлық, шұғыл көмек көрсетіп жатыр. Медициналық пункттер барлық қажетті дәрі-дәрмектермен, медициналық құрал-жабдықтармен жабдықталған. Дәрігерлер ауысыммен жұмыс істеп жатыр.

- Эвакуацияланғандардың арасында жүкті әйелдер де, оның ішінде жақын арада босанатындар да бар? Оларды есепке қою, тіркеу туралы айтсаңыз?

- Маңғыстау эвакуациялау пункттеріне атыраулық 128 жүкті әйел жеткізілді. Осы уақытқа дейін 15 бала дүниеге келді. Қазір Ақтау қаласындағы эвакуациялық пункттерде атыраулық 1 500 адам бар болса, оның 900-і - балалар. Эвакуацияланғандар арасында жүкті әйелдер де бар. Медициналық пунктке келген әрбір жүкті әйелден деректер алынады және эвакуациялық пунктке қызмет көрсететін емханаға бекітіледі.

Әйелдер, балалар және созылмалы аурулары бар адамдар тегін медициналық көмектің кепілдік берілген көлемі мен міндетті әлеуметтік медициналық сақтандыру жүйесі бойынша барлық медициналық көмекті ала алады. Жұмыс орны бойынша декреттік демалысқа жіберіледі. Медициналық ұйым сұраныс бойынша барлық қажетті анықтамалар мен еңбекке жарамсыздық парақтарын бере алады.

- Эвакуацияланғандардың арасында созылмалы ауруларға байланысты Атырау облысында диспансерлік есепте тұрғандар да бар шығар? Бұл науқастар қажетті дәрі-дәрмектермен қалай қамтамасыз етіледі?

- Қазіргі уақытта облыстың медициналық ұйымдарына созылмалы аурулары бар 150 адам тіркелген. Бұл - диспансерлік есепте тұрғандар және қажетті дәрі-дәрмектерді тегін алуға тиіс адамдар. Атырау облысында диспансерлік есепте тұрған адамдар медициналық пунктке жүгінеді. Біздің медицина қызметкерлері деректерді алады, eGov арқылы медициналық ұйымға бекітеді, тиісінше дереу есепке алады және барлық қажетті дәрілік препараттармен қамтамасыз етеді. Егер бұл артериялық гипертензия болса, онда қысымды төмендететін дәрілер, егер бұл қант диабеті болса, онда инсулин препараттары беріледі. Қаржыландыруды әлеуметтік медициналық сақтандыру қоры бөледі.

- Облыста диспансерлік есепте тұрғандармен қатар атыраулықтарды есептегенде дәрілік препараттар жеткілікті ме?

Қазіргі уақытта облыста бізде дәрілік препараттардың екі айға жететін қоры бар. Біз қазір жағдайды бақылап отырмыз. Осылайша, қазір үлкен қосымша қажеттілік байқалмайды. Егер дәрілік заттарды көп тұтыну байқалса, онда дәрілік заттарға қосымша өтінім жасалады. Қазіргі уақытта Маңғыстау және Атырау азаматтары үшін қолда бар қорлар жеткілікті.

- Эвакуацияланғандардың арасында көптеген балалар бар, оларға қандай көмек көрсетіледі?

Атырау облысынан Маңғыстауға эвакуацияланған балаларға стационарлық және амбулаторлық көмек көрсетіліп жатыр. Өтінішпен келген адамды дәрігер тексереді. Егер ол стационарлық көмекке мұқтаж болса, ауруханаға жіберіледі. Амбулаторлық бақылау қажет болса, емдеу және одан әрі бақылау тағайындалады.

- Ауруханада емделуге мұқтаж адамдар бар ма?

Қазіргі таңда стационарларда артериялық гипертензия, жүректің ишемиялық ауруы, қант диабеті, холецистит, панкреатит сияқты аурулармен ауыратын 94 науқас тәулік бойы ем қабылдап жатыр.

- Эвакуацияланғандардың арасында қымбат дәрі-дәрмектерді қажет ететін сирек кездесетін аурулары бар адамдар бар ма?

- Әзірге мұндай мәселелер бойынша ешкім жүгінген жоқ.

- Көп рахмет!

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.