Былтыр Маңғыстау облысында АИТВ инфекциясымен 48 адам тіркелген. Олардың 42-і Қазақстан Республикасы азаматтарының арасында тіркелген болса, 6 адам шет елдер азаматтары арасынан анықталды.
2018 жылы АИТВ инфекциясымен 52 жағдай тіркеліп, оның ішінде 45-і Қазақстан азаматтары арасынан болатын. АИТВ инфекциясы облыстың Маңғыстау ауданынан басқа барлық аймақтарда тіркелгенімен, көрсеткіштің 67 пайызы Ақтау қаласында анықталды.
Маңғыстау облыстық ЖИТС-ке қарсы күрес және оның алдын алу жөніндегі орталығы эпидемиология бөлімінің меңгерушісі Жәмилә Махамбетқалиеваның айтуынша, қазіргі таңда АИТВ инфекциясымен өмір сүріп жатқан адамдарды қоғамда қабылдау біршама қиындықтар туғызып отыр. Қоғамда әлі кезге дейін аталған инфекция тек қана есірткі қолданушылар мен жеңіл жүрісті адамдардың арасында кезігеді деген жалған түсінік қалыптасқан және де бұл пікір дұрыс емес.
Бүгінде АИТВ инфекциясы бойынша жағдай өзгерді және АИТВ инфекциясы жағдайы барлық адамдарда, әсіресе жастар арасында көп кездеседі. Оның ішінде 20-49 жастағылар арасында анықталып, бұл барлық тіркелген жағдайлардың 86 пайызына жетіп отыр.
- АИТВ инфекциясы әйелдерге қарағанда ер азаматтар арасында 3 есе жиірек тіркеледі, - дейді маман. - Алғашқы тіркелу кезеңінде АИТВ инфекциясы жұмыссыздар арасында, яғни қоғамда белгілі орны жоқ адамдар арасында тіркелген болса, қазіргі таңда 48 пайыз жұмыс жасайтын адамдар арасында анықталып отыр. Қоғамдағы дені сау адамдар арасында тіркелгендіктен, негізі АИТВ инфекциясының берілу жолы жыныстық қарым қатынас арқылы болып тұр. АИТВ-инфекциясы анықталған адамдармен тексерілуге дейінгі және тексерілуден кейінгі кеңестер беріліп, адамдарға құқығы мен міндеттері, алдын алу туралы түсінік жұмыстары жүргізіліп, жақын қатынастағы адамдары тексерілді. АИТВ инфекциясы анықталған адамдар облыстық ЖИТС орталығында диспансерлік есепке алынып, тегін антиретровирустік ем қабылдауда. Қазақстан Республикасы АИТВ инфекциясы бойынша шоғырланған сатыда, яғни аталған дерт қадағалауда. Республикада АИТВ инфекциясына қарсы адамның ағзасында вирусты төмен деңгейде ұстап тұратын белсенді дәрі-дәрмектер бар. Алайда, бір өкініштісі осы кезге дейін аталған инфекцияға қарсы вакциналар мен ағзада вирусты толықтай жоятын дәрі-дәрмектердің шығарылмауы.
Сондай-ақ Жәмилә Әбдіқадірқызы қоғамда әрбір адам өз денсаулығына жауапкершілікпен қарап, АИТВ инфекциясы бойынша статусын білгені жөн екендігін ескертті. Ол үшін анонимді, құпиялы, ерікті, тегін тексерілуден өтуге болады. Тексерілуден өту үшін тұрақты мекен-жайы бойы бойынша тіркелген емханада немесе Ақтау қаласындағы 3-шағын аудан, 170-ғимаратта орналасқан облыстық ЖИТС-ке қарсы күрес және оның алдын алу жөніндегі орталығына келіп, тексерілуге болады.
АИТВ инфекциясы бойынша сұрақтар туындаған кезде 50-40-49 сенім телефонына немесе орталықтың www.antispid.kz сайтына хабарласуға болады.
Валентина ҚОЗЫБАҚОВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
