Сенат депутаттары Бейнеуге келді

Маңғыстаудан сайланған Сенат депутаттары Сүйіндік Алдашов пен Бекбол Орынбасар және облыстық мәслихат төрағасы Жаңбырбай Матаев іссапармен Бейнеуге келді. Аудан әкімі Рахымжан Шалбаев және аудандық мәслихат төрағасы Ардақ Бораш олармен бірге жүрді.

Олар алдымен Тәжен кеден бекетіне барып, кеден бекетін толықтай қайта жабдықтау мақсатында жүргізіліп жатқан құрылыс жұмыстарымен танысты. Оларға мердігер компания басшысы құрылыс жұмыстарын осы жылдың аяғына аяқтауды жоспарлап отырғандарын жеткізді. Сонымен қатар депутаттар Тәжен ауылында салынып жатқан жаңа медициналық пункттің құрылысын барып көрді.

Сенат депутаттарының ауданымызға іссапары барысында Бейнеу-Бозой-Шалқар жолының құрылысын бастауға дайындық жұмыстары талқыланды. Аудан әкімі Рахымжан Шалбаев экономикалық дамуға серпін береді деп күтіліп отырған жол құрылысының тезірек басталуына депутаттар ықпал етсе екен деген ұсынысын жеткізді.

Депутаттар одан әрі Бейнеу астық терминалына ат басын тіреді. Олар инвестордың астық терминалын қайта қалпына келтіру жұмысының қарқыны және сапасымен танысты. Сонымен қатар, инвестор Жаңбырбай Досбаевтың астық терминалының жанындағы егін алқабында жасалып жатқан жұмыстарды қарады.

Осылайша ауданымыздағы маңызды нысандарды аралап, атқарылып жатқан жұмыстармен танысқан Сенат депутаттары аудан, аумақ және ел экономикасын дамытуға тың серпін беретін жобаларды жүзеге асыру бүгінгі таңда маңызды екені туралы пікірлерін білдірді.

Үміт ҚАЗДАЕВА.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.