Ақтауда Айзат Асқарқызы сән үйі мен «Сен сұлу» спа сауықтыру орталығы ашылды

Ақтауда ұлттық нақыштағы киімдер тігетін сән үйі мен «Сен сұлу» спа сауықтыру орталығы ашылды, деп хабарлайды mangystaumedia.kz.

Кәсіп иесі - Айзат Асқарқызы. Ол сән үйі өз тутынушыларына бір-біріне ұқсамайтын қазақы нақыштағы көйлек, кәжекей, камзолдарды ұсынатынын айтады. Ал сауықтыру орталығында қыз-келіншектер үшін түрлі процедуралар бар.

«Мен сән үйін алғаш осыдан үш жыл бұрын 40 шаршы метр дүкеннен бастадым. Қазақы нақыштағы, Маңғыстаудың төл ою-өрнектерін пайдаланып, қыз-келіншектерге сапалы киімдер ұсынып келдім. Бүгінде тұрақты тұтынушыларымыз бар. Мақсатымыз - ұлттық киімді дәріптеп, әлемге таныту. Әрі қарай сән үйін Қазақстанның басқа қалаларынан ашуды жоспарлап отырмыз», - деді кәсіпкер Айзат Ысқақова.

Айзат Ысқақова бүгінде 25 адамды жұмыспен қамтып отыр. Олардың қатарында тігіншілер, дүкеншілер, тазалық мамандары бар.

Ал «Сен сұлу» спа сауықтыру орталығының білікті мамандары қыз-келіншектерге спа, массаж, фито бөшке сияқты қызмет түрлерін көрсетеді. Кәсіпкер спа салонын «тән мен жанның бір жерде үйлесімділік табатын орны» деп сипаттады. Айзат маңғыстаулықтарды спа салонында демалуға шақырады.

Кәсіпкер алдағы уақытта жұмысшылар санын көбейтіп, кеңсесін кеңейтуге ниетті.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.