«Nomad run» ультрамарафоншылар жобасының қатысушылары Ақтауға келіп жетті

Елімізде алғаш рет ұйымдастырылған «Nomad run» жобасы аясында Астана қаласынан бір ай бұрын шыққан марафоншылар Ақтауға жетті. Олар 8 мың шақырымды жүгіріп өтіп діттеген межесін бағындырды, деп хабарлайды mangystaumedia.kz Қоғамдық коммуникация орталығыне сілтеме жасап.

Ультрамарафон 25 сәуірде Астана қаласында бастау алған еді. Бес адамнан құралған команда бір ай ішінде Қазақстанның 18 қаласын 100-ден аса елді-мекенін жүгіріп өтіп, күрделі шақырымды бағындырды.

«NOMAD RUN» - иделогиялық жоба. Біз үлкен қашықтыққа жүгіру арқылы халық арасында салауатты өмір салты мен бұқаралық спортты насихаттауды көздедік. Өзімнің жасым 55-те. 30 жылдан астам уақыт спортпен ұдайы шұғылданамын. Меккеге де жаяу жүгіріп барғанмын. Маған еліміздің барлық қалаларын жүгіріп өту жөнінде ұсыныс түскенде бірден келістім. Себебі халық арасында ультрамарафон ұғымын мығым қалыптастыруды және ішкі туризмді дамытуды көздедім. Ультрамарафон дегеніміз - ұзақ қашықтыққа жүгіру. Елордадан бастап, Қарағанды, Жезқазған, Қызылорда, Шымкент, Тараз, Алматы, Талдықорған, Өскемен, Семей, Павлодар, Көкшетау, Петропавл, Қостанай, Ақтөбе, Орал, Атырау қаласына аялдап, бүгін Ақтау қаласына жүгіріп жеттік», - деді қатысушы Меңдібай Әлімбаев.

Марафоншылар Ақтауда жетіп, мәре сызығын кесіп өтті. Осылайша Қазақстанның «Гиннестер кітабына» еліміздегі алғаш үлкен қашықтықта жүгіріп өткендер ретінде енді. 33 пен 55 жас аралығындағы команда мүшелері мұнымен тоқтап қалмақ емес. Алдағы уақытта Ақтау қаласынан Мекке дейін жүгіріп баруды жоспарлап отыр.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.