Швейцариялық инвесторлар Маңғыстауда бекіре және уылдырық өсіруді жоспарлауда

Ақтауда аймақ басшысы Нұрлан Ноғаев швейцариялық "Rey Group" компаниясының басшылығымен кездесті, - деп хабарлайды mangystaumedia.kz Маңғыстау облысы әкімінің баспасөз қызметіне сілтеме жасап.

Кездесуге "Rey Group" президенті Кристиан Рей де Руддер, "Swiss Choice SAND" бас атқарушы директоры Хавьер Рей қатысты.

"Rey Group" компаниясы бекіре және уылдырық өсіретін кешен салуды жоспарлап отыр. Кәсіпорын бастапқы кезеңде жылына 100 тонна бекіре және 10 тонна уылдырық өндіреді.

– Маңғыстауда балық өндірісін ұлғайту өңірді дамытудың ең маңызды аспектісі болмақ. Индустриялық балық өсіру - тоғандық және жайылымдық балық өсірумен салыстырғанда тауарлық балықты өндірудің ең тиімді әдісі. Яғни, бұл әдіс кез келген климаттық аймақта әртүрлі балық түрін өсіруге мүмкіндік береді. Біз, инвесторлар ретінде облыс басшылығының жан-жақты қолдауын сезінудеміз. Сондай-ақ экономикалық маңызды жобаның орындалуына қызығушылығын көріп отырмыз, – деді "Rey Group" президенті Кристиан Рей де Руддер.

Аймақ басшысы Нұрлан Ноғаев Маңғыстау облысының инвестициялық жобаларды жүзеге асыруға әлеуеті зор екенін атап өтті.

- Сізді Қазақстанда көргенімізге қуаныштымыз. Сонымен қатар Маңғыстау облысында балық шаруашылығын дамытуға қызығушылық танытқаныңыз үшін алғыс білдіреміз. Қолда бар мүмкіндікке, сондай-ақ швейцариялық тараптың тәжірибесіне сүйене отырып, инвестиция тартуға және тәжірибе алмасуға үміттіміз. Аталған саланың дамуы өндіріс көлемін арттыруға, жаңа жұмыс орындарын ашуға мүмкіндік береді, - деді Нұрлан Ноғаев.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.