Бүгін, 22 наурызда облыс әкімі Нұрлан Ноғаевтың қатысуымен ерекше балаларға арналған Наурыз мейрамы аталып өтті, - деп хабарлайды mangystaumedia.kz Маңғыстау облысы әкімінің баспасөз қызметіне жасап.
Мерекелік шара «Мейірімді ана» қоғамдық қорының бастамасымен «Өз жүрегіңді аш» қоғамдық қорының қолдауымен ұйымдастырылып отыр. Шараға 300-ге жуық бала қатысып, оларға тәттілер таратылды. Сонымен бірге, аниматорлар мерекелік ойын-сауық бағдарламасын көрсетті.
Бұған дейін ұйымдастырушылар облыс аудандарын аралап, 700 балаға мерекелік көңіл-күй сыйлаған болатын.
Айта кетейік, облыс бойынша 8 210 бала ерекше білім алуды қажет етеді. Оның 3 146-сы - мүмкіндігі шектеулі балалар.
Аймақ басшысы Нұрлан Ноғаев балаларды Наурыз мерекесімен құттықтады.
– Мемлекет басшысы Қасым-Жомарт Кемелұлы Тоқаевтың тапсырмасымен балаларды, жасөспірімдерді де сапалы білім алуға, тәрбиелеуге жағдай жасалуда. Ұлы халқымыздың салт-дәстүрін жастар біліп, құрметтесе екен. Сондай-ақ қазір ерекше қажеттіліктері бар балаларға мемлекет тарапынан қаржылық және әкімшілік қолдау көрсетіледі. Наурыз мерекесі жақсылық әкелсін! Балалардың болашағы жарқын болсын! – деді Нұрлан Ноғаев.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
