Неміс университеттерімен нысаналы мақсатымызға нық қадам жасадық

Бір аптадан бері Германияда іссапарда жүрміз. Күнделікті жұмыстарымыз бен кездесулеріміз және келісімдеріміз туралы әлеуметтік желілердегі парақшамызда жазып жүрміз. Газеттер мен сайттарда шағын ақпараттар жарияланып жатыр. Ала енді апталық сапарымызды қорытындылап, жаңалықтарымызды жалпылама жариялауды жөн көрдік.

Осы оқу жылының басында Мемлекет басшысы Қасым-Жомарт Тоқаев Германия Үкіметімен кездесуінде неміс инвестициясы үшін барлық қолайлы жағдай жасайтынын айтты: «Қазақстанның Еуропа Одағындағы ең маңызды серіктесі Германия капиталының үлесі бар 600-ден астам кәсіпорын елімізде табысты жұмыс істеп жатыр. Сауда-саттықты арттырып, инвестиция көлемін ұлғайту үшін мол әлеует бар, – деді.

Сонымен қатар Германияның техникалық мамандықтар бойынша кадр даярлау тәжірибесіне қызығушылық білдірді. Отандық мамандарымыздың кәсіби деңгейін көтеру үшін Германияның техникалық институттары өкілдіктерін, зертханаларын, ғылыми және құзырет орталықтарын ашу мүмкіндігін қарастырып жатқанымызды атап өтті.

Президентіміздің 2025 жылдың соңына дейін елімізде жетекші шетелдік жоғары оқу орындарының филиалдарын ашуды тапсырған болатын. Осы мақсатта Қазақстан-Неміс университеті (DKU) және Yessenov University бірлескен бастамасымен Ақтау қаласында «German Institute of Engineering» атты институттың ашылуы жоспарланды. Неміс университеттер консорциумы аясында ашылатын жаңа институт Маңғыстау өңірінде техникалық өнеркәсіптің әртүрлі салаларында жұмыс істейтін мамандарды дайындауға мүмкіндік береді.

Аталмыш институтта энергия, қоршаған орта және жер, логистикалық ағын жүйелері, озық инженерия, мұнай-химия, ақпараттық технологиялар және цифрландыру сияқты басым салалардағы жоғары инженерлік білім беру үшін неміс стандарттары енгізіледі.

Біріккен инженерлік институттың ұйымдық құрылымын жасақтадық. Сонымен қатар, тереңдетілген бағыттар бойынша білім беру бағдарламаларының портфолиосын дайындадық.

Қазақстан-Неміс инженерлік институты ашыла салысымен Вильдау техникалық университеті, Гамбург техникалық университеті, Анхальт қолданбалы ғылымдар университеті, Берлин техникалық университеті, Берлин еркін университеті сияқты Германиняның жетекші ЖОО-мен 8 бакалавриат және 6 магистратура бойынша қосдиплом мен үшдипломды білім бағдарламаларын іске асыруды жоспарлап отыр.

Биылғы қыркүйектен бастап бакалавриат деңгейінде Германиядағы Вильдау техникалық университетімен бірлесіп логистика мамандығы, Гамбург техникалық университетімен энергетика және экологиялық инжиниринг мамандықтары бойынша мемлекеттік тапсырыс негізінде 60 студент қабылдауды көздеп отырмыз. Бұл институттың түлектері «Svevind group» компаниясында жұмыс істеуге мүмкіндік алады.

«Svevind group» 2025 жылы Маңғыстау облысында Жасыл сутегін өндіретін зауыттың құрылысын бастауды жоспарлап отыр. Қуаты 30-40 ГВт күн және жел қондырғылары 20 ГВт электролизді қуаттайды.

Біз бұл іссапарымызда Есенов университетіндегі жаңа бастаманы жүзеге асыру мақсатында маңызды межені ойдағыдай аяқтадық. Мәселен, Гамбург техникалық университеті және Вильдау техникалық университетімен алғашқы үшжақты келісімдерімізді жасадық. Анхальт қолданбалы ғылымдар университетімен екіжақты ынтымақтастық туралы меморандумға қол қойдық.

Тағы бір жағымды жаңалығымыз – Халықаралық бағдарламар орталығының «500 ғалым» жобасы аясында университетіміздің 12 ғалымы Гамбург техникалық университеті, Берлин техникалық университеті және Анхальт қолданбалы ғылымдар университеттерінде ғылыми тағылымдамадан өту мақсатында байқауға құжаттарын тапсырды.

Германияның жетекші университеттерімен орнатылған ынтымақтастық Маңғыстау өңіріндегі Қазақстан-Неміс инжиниринг институтының жұмысына қосымша серпін береді. Біздің бұл келісімдеріміз алдын ала рәсімделген меморандум құжаттарына қол қою ғана емес, серіктестіктің барлық қағидаларын қатаң сақтауды қажет ететін жүйелі жұмыстар бойынша жоспарланған. Ортақ бағдарламамыздың тұрақтылығын қамтамасыз етуге және қаржыландыруға неміс үкіметі де мүдделі екеніне анық көз жеткіздік. Осылайша отанымызға олжалы оралғалы отырмыз.

Берік АХМЕТОВ,

Yessenov University президенті.

Германия, Берлин

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.