Mańǵystaý Media
16+
Редакция
+7 (7292) 20 48 34
hat@mangystaumedia.kz
Жарнама бөлімі
+7 778 145 90 93
reklama@mangmedia.kz
© МО әкімдігі
4 маусым күні Маңғыстау облысының әкімі Нұрдәулет Қилыбайдың төрағалығымен өткен аппарат отырысында өңірдегі балық аулау және балық өсіру шаруашылығын дамытудың өзекті мәселелері талқыланды, деп хабарлайды mangystaumedia.kz облыс әкімінің баспасөз қызметіне сілтеме жасап.
Облыстық балық шаруашылығы басқармасының басшысы Арман Мулдашевтың айтуынша, Каспий теңізінің Маңғыстау секторының жағалауы 33 кәсіптік балық аулау учаскесіне бөлінген. Атап айтқанда, Түпқараған ауданында – 22, Қарақия ауданында – 11. Қазіргі таңда 24 кәсіптік балық аулау учаскесі 16 табиғат пайдаланушыларға бекітілген. Резервте 9 учаске бар.
Өңірде 811 балықшы маусымдық, 75-і тұрақты түрде балық аулаумен айналысады.
2023 жылдың шілдесінен 2024 жылдың шілде айына дейін облыс бойынша 11 152,0 тонна балық аулау лимиті бекітілген. Табиғат пайдаланушылардың өтінімі негізінде басқарма 3781 тонна балық аулауға 618 рұқсат берген.
– Жыл сайын Каспий теңізінде балық қорын молайту жұмыстары жүзеге асады. Атап айтқанда, 2023 жылы табиғи ортаға 47 020 (2022 жылы – 16 220) бекіре шабақтары жіберілді. 2024 жылы 44 250 шабақ жіберу жоспарланып отыр. Каспий теңізінде заңсыз балық аулаудың алдын алу жұмыстарын жандандыру мақсатында 2023 жылы облыс әкімдігі балық қорғау инспекциясына 2 моторлы қайық және 2 Toyota Hilux автокөлігін алып берді. Сонымен қатар, балық шаруашылығы басқармасы жанынан «Жануарлар дүниесін қорғау жөніндегі қызмет» КММ құрылды, - деді Арман Мулдашев.
Сондай-ақ, аппараттық жиынға қатысқан балық шаруашылығы саласының өкілдері Каспий теңізінің қазақстандық бөлігінде балық шаруашылығын дамыту үшін ғылыми-зерттеу базасының жоқтығын, кадр тапшылығын және балық өсіру бассейндерін салуға жер бөлу мәселелерін көтерді.
Жиын қорытындысы бойынша өңір басшысы Нұрдәулет Қилыбай жауапты мемлекеттік органдарға аталған түйткілдің түйінін тарқату бағытында бірқатар нақты тапсырмалар жүктеді.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.