Маңғыстау облыстық музейінде «Музей түні» акциясы ұйымдастырылды

© Маңғыстау облыстық тарихи-өлкетану музейі

Ақтауда Әбіш Кекілбайұлы атындағы Маңғыстау облыстық тарихи-өлкетану музейінде «Музей түні» акциясы өтті, деп хабарлайды mangystaumedia.kz.

Бұл акция жыл сайын музей күніне арнайы ұйымастырылатын ерекше іс-шаралардың бірі. Жиында өскелең ұрпаққа тарих пен дәстүрді дәріптеу, ұлттық мәдениетімізді насихаттау мақсатында бірқатар іс-шаралар ұйымдастырылды.

Облыстық музей директоры Эльвира Абланова музей қызметкерлерін төл мерекемен құттықтап, жылы лебізін білдірді.

- Бүгін музейде дәстүрлі «Музей түні» акциясы өтіп жатыр. Іс-шара 2 бөлімнен тұрады. Акция аясында тұрғындар музей қорына бірқатар тарихи жәдігерлерді табыстады. Белгілі журналист Маңдайлы Қосымбаева өз архивінде сақталған Әбіш Кекілбайұлының төл қолжазбасын мұражайға арнайы тапсырды. Сондай-ақ, алғаш рет «Атадан жеткен асыл тін» атты кілемдер көрмесі ұйымдастырылды. Тоқыма өнерінің озық туындысы ретінде бұл кілемдер 19-ғасырдың екінші жартысынан бері сақталып келген, - деді Эльвира Абланова.

Сонымен қатар, биыл «Музей түні» акциясы аясында 2000-нан аса көрермен мұражай экспонаттарын тамашалауға ниет танытқан. Келушілер экспозициялық залдарын тегін аралап, ұлттық және ретро ойындарға қатысып, сыйлықтарға ие болды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.