Қаракөл көлінде өлген аққулардың саны 200-ден асты

Ақтау маңындағы Қаракөл көлінен барлығы 227 аққудың өлексесі табылды, деп хабарлайды mangystaumedia.kz.

«21 желтоқсаннан бері қорық инспекторлары 132 аққудың өлексесін тапты. 2 қаңтардағы жағдай бойынша өлген аққулар саны 227-ге жетті. Оның ішінде 132 аққудың өлексесі жойылды, тағы 95 аққу 3 қаңтарда ветеринариялық заңнамада белгіленген тәртіп бойынша жойылады», - деді Маңғыстау облыстық экология департаменті таратқан ақпаратта.

Зерттеу нәтижелері бойынша өлген аққулардан құс тұмауының вирусы табылды.

Жергілікті атқарушы органның ақпараты бойынша, ветеринария мамандары үй құстарына екпе жасау жұмыстарын жүргізіп жатыр.

Аталған факті бойынша қорық және облыстық орман шаруашылығы және жануарлар дүниесі аумақтық инспекциясының мамандары Маңғыстау облысының Экология департаментінің ЭЫДҰ, АШМ Ветеринариялық бақылау және қадағалау комитетінің Ветеринария жөніндегі Ұлттық орталығының қызметкерлерімен бірлесіп тиісті зертханалық зерттеулер жүргізу үшін сынамалар алды.

Айта кетейік, 21 желтоқсанда Үстірт мемлекеттік табиғи қорығының қызметкерлері Қаракөл көлінде рейдтік іс-шараларын өткізу кезінде 30 сыбырлақ аққудың өлексесін тапқан болатын.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.