Адай жылқысын брендімізге айналдыру қажет - Тоқаев

© Zakon.kz

Маңғыстау облысы жұртшылығымен кездесуінде Қасым-Жомарт Тоқаев Қазақ Адай жылқысын Маңғыстаудың бірегей байлығы деп атады. Президент бұл арғымақтар шөлге ерекше шыдамды, алыс жолға төзімді екенін атап өтті, деп хабарлайды mangystaumedia.kz.

«Маңғыстаудың табиғаты түйе өсіруге өте қолайлы екені белгілі. Қазір облыста 90 мыңға жуық түйе бар. Түйе өнімдеріне бүкіл елімізде сұраныс өте жоғары. Одан алынатын шикізатты терең өңдеу жұмысын қолға алу қажет. Бұл өнімнің түрін көбейтеді әрі оның бағасына оң ықпал етеді. Үкіметке түйе шаруашылығын қолдауға арналған мемлекеттік шараларды күшейту мәселесін пысықтауды тапсырамын. Бұл салаға субсидия беру жолдарын да қарастыру керек. Халқымыз үшін жылқының орны қашанда ерекше», - деді Қасым-Жомарт Тоқаев.

Президенттің сөзінше Қазақ Адай жылқысын Маңғыстаудың бірегей байлығы деуге болады. Бұл арғымақтар шөлге ерекше шыдамды, алыс жолға төзімді екенін бәрі біледі. Маңғыстау тұлпарлары алысқа шабатын халықаралық марафон жарыстарында әрдайым бәйге алып жүр.

«Жақында өткен «Ұлы дала жорығында» облыс шабандоздары жеке-дара озып келді. Қазақ Адай жылқысын әлемге таныта алсақ, бұл біздің тағы бір тамаша брендімізге айналады. Сондықтан, Үкіметке оны ғылыми түрде асыл тұқымды мал ретінде тану және көбейту үшін тиісті жұмыстарды жедел қолға алуды тапсырамын», - деді Президент

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.