20 үйге 20 млн теңге: Ақтауда апатты үйлер анықталады

Тұрғын үйлердің жағдайын анықтау үшін мамандарылған ұйым техникалық тексеру жүргізеді. Тексерумен айналысатын ұйым конкурс арқылы анықталмақ, деп хабарлайды mangystaumedia.kz.

Үш жыл бұрын Ақтауда 8 шағын ауданда екі кіреберістің маңдайшасы құлады. Бұл жағдайдан кейін Ақтау үйлеріндегі кіреберіс күнқағарлары тексеріле бастады. Содан соң әкімдік ПИК-ке тексеру жүргізіп, апатты жағдайларды анықтауды тапсырған еді.

"Бұл жұмыс орындалды. Әрбір ПИК-те апаттық жағдайда тұрған кіреберіс маңдайшаларының тізімі бар. Қала бойынша қаншасы бар екенін біз білмейміз, өйткені бұл тұрғындардың меншігі. Бюджеттен жөндеуге қаражат бөлінбейді. Жөндеу тек тұрғындардың есебінен жүзеге асырылады. Қазір бүкіл қала бойынша кіреберіс күнқағарлары жөнделуде. Жөндеу тек тұрғындардың келісімімен жасалады. Алайда күнқағар апатты жағдайда болса, онда ПИК тұрғындардың келісімінсіз жөндеу жүргізеді", - дейді Ақтау қалалық тұрғын үй инспекциясының басшысы Нұрадин Көшербаев.

Әкімдік өкілінің айтуынша, Ақтауда апатты үйлерді мамандандырылған ұйым анықтай анықтайтын болады.

"819 үй ескі. Үйдің апатты екендігі туралы қорытындыны техникалық тексеруден кейін мамандандырылған ұйым ғана бере алады. Әкімдікте мұндай өкілеттік жоқ. Биыл 20 үйге 20 миллион теңге бөлінді. Ақша шотқа түскен сәтте, біз ашық конкурс жариялаймыз. Содан кейін үйлер, оның ішінде күнқағарлардың жағдайы тексеріледі", - деді Нұрадин Көшербаев.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.