Ақтаудың әскери сүңгуірлері кәсіби шеберлігін шыңдауда

Ақтауда әскери-теңіз күштерінің жауынгерлік жүзушілері жеңіл сүңгуірлік дайындық жиынына қатысты, деп хабарлайды mangystaumedia.kz Қорғаныс министрлігінің баспасөз қызметіне сілтеме жасай отырып.

Сабақ барысында әскери қызметшілер сүңгуірлік жарақтың материалдық бөлігін және тактикалық-техникалық сипаттамаларын зерделеп, сынақтар тапсырды және арнайы жабдықты пайдалануға рұқсат алды.
Жеке құрам сүңгуірлерді түрлі тереңдікке түсіруді пысықтады. Жарғыш заттар қойылған және зақымданған жерлерді анықтау мақсатында кемелердің түбі мен бұрандаларын қарап шықты. Дайындықтың барлық кезеңінде нұсқаушылар қауіпсіздік шараларын сақтауға ерекше назар аударды.

– Жиынның басты мақсаты – әскери қызметшілердің өз бетінше де, топ құрамында да арнайы міндеттерді орындауға ұдайы әзірлікте болуы. Әрбір сүңгуір жарақты, жабдықты, су асты құралдарын пайдалана отырып, жұмысты орындай алуы тиіс, – деп атап өтті Әскери-теңіз базасының іздестіру-құтқару қызметі мен сүңгуір жұмыстарының аға офицері майор Нұрлан Оңалбаев.

Қарулы күштердегі жауынгерлік даярлық іс-шаралары ел Президенті Қасым-Жомарт Тоқаевтың Қазақстан армиясының жауынгерлік қабілетін түбегейлі арттыру жөніндегі тапсырмасын іске асыру аясында жүргізіліп жатқанын атап өткен жөн.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.