Ақтауда жылжымалы радарларды орнату заңды ма?: ПД басшысы жауап берді

Бүгін Маңғыстау облыстық полиция департаментінің басшысы Аян Дүйсембаев тұрғындармен кездесу өткізіп, сұрақтарына жауап берді, деп хабарлайды mangystaumedia.kz.

Кездесу барысында тұрғындар тарапынан Аян Сәбитұлына “Ақтауда жол жиегіне жылжымалы “Крис-П” құрылғысының орнатылуы заңды ма?” деген сұрақ қойылды.

Өңірдің бірінші полицейінің сөзінше, фоторадарлар 4 наурыздан бастап қойылған. Сол уақыттан бері, жылжымалы радарлардың тұрған аумағында жол-көлік оқиғасы болмаған. Осы “Крис-П” құрылғысының көмегімен 4 наурыздан бері жылдамдықты асырған 738 факті анықталып, 7 миллион теңгеге жуық айыппұл салынған.

- Ақтауда 2020 жылы 86 жол-көлік оқиғасы болып, 103 адам жарақат алып, 5 адам қаза тапты. Ал былтыр 110 жол-көлік оқиғасы болды. Одан 130 адам жарақаттанып, 15 адам бақилық болды. Жол апатының басты себебі - жылдамдықты арттыру. Сондықтан, біз жол-көлік оқиғаларын азайту үшін “үш аяқты камераларды” қала ішіне қойдық. Министрліктен қандай да бір нұсқаулық бар. Бірақ, нұсқау ол заң емес. “Крис-П” құрылғыларын қоюға заңмен рұқсат етілген, - деді Маңғыстау облыстық ПД басшысы Аян Сәбитұлы.

Махаббат Нұржанқызы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.