Серікбай Трұмов Сенат депутаты ретінде ант берді

ҚР Парламенті Сенатының депутаты Серікбай Өтелгенұлы Трұмов Қазақстан халқы алдында ант берді, деп хабарлайды mangystaumedia.kz сайты ҚазАқпаратқа сілтеме жасап.

«Өздеріңізге белгілі, Мемлекет басшысының жарлығымен Серікбай Трұмов Сенат депутаты болып тағайындалды. Ол жұмысшыдан басталған еңбек жолында Маңғыстау облыстық мәслихатының хатшысы, сондай-ақ қала әрі облыс әкімі сияқты жауапты қызметтерді атқарып, туған өңірінің өсіп өркендеуіне зор еңбегін сіңірді. Енді, біздің қатарымызға қосылып отыр», - деді Сенат төрағасы Мәулен Әшімбаев.

Осы орайда С.Трұмов депутат ретінде ант берді.

«Қазақстан халқына адал қызмет етуге, Қазақстан Республикасының тұтастығы мен тәуелсіздігін нығайтуға, оның Конституциясы мен заңдарына қатаң бағынуға, депутаттың өзіме жүктелген мәртебелі міндеттерді адал атқаруға ант етемін», - деді ол.

Жалпы отырыс барысында палата депутаттары С. Трұмовты Сенаттың Аграрлық мәселелер, табиғатты пайдалану және ауылдық аумақтарды дамыту комитетінің құрамына сайлады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.