Маңғыстауда ауыл әкіміне кандидаттарды ұсыну аяқталды

Бұл туралы Қоғамдық коммуникация орталығында өткен брифингіде Маңғыстау облыстық сайлау комиссиясы төрағасының орынбасары Исахан Сағынбаев айтты.

Оның айтуынша, 10 шілде күні 39 кандидаттың құжаттары тексерілді. Оның ішінде 34 үміткердің құжаттарының заңнамаға сәйкестігі анықталды. 39 кандидаттың арасында 1 әйел адам қатысып отыр.

«Кандидаттардың орташа жасы 38 жас, ең жасы 25 жаста, ең үлкені 60 жаста. 13 үміткер сайлау өтетін ауылдық округінде тұрады, 20 үміткер сайлау өтетін ауданда тұрады, 6 үміткер басқа аудандарда тұрады», - деді Исахан Сағынбаев.

Барлығы 39 кандидат ұсынылды. Оның 17-сі саяси партиялардан, 22-сі өзін-өзі ұсынды. Орташа бәсекелік 4 адам. Саяси партиялар 10 округ бойынша өз кандидаттарын ұсынды: «Nur Otan» партиясынан - 8 үміткер, «Ақ жол» партиясынан - 2 кандидат, «АДАЛ» партиясынан - 3 кандидат, Қазақстан халық партиясынан - 3 кандидат, Жалпыұлттық социал-демократиялық партиясынан - 1 кандидат.

Өңірде 25 шілде күні ауылдардың, ауылдық округтердің 10 әкімін сайлау 7 ауданның төртеуінде жоспарланған.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.