Облыс әкімі Бекзат Нұрдәулетов пен Марат Жәкиевты қабылдады

Кеше облыс әкімі С.Трұмов Токиода өтетін жазғы олимпиада ойындарында бокстан қазақ елінің намысын қорғайтын Бекзат Нұрдәулетов пен оның бапкері Марат Жәкиевты қабылдады, деп хабарлайды mangystaumedia.kz.

23 шілде мен 8 тамыз аралығында Жапонияда өтетін олимпиадада Б. Нұрдаулетов 81 келі салмақта жұдырықтасады.

Аймақ басшысы әлем көз тіккен спорттық додада маңғыстаулық былғары қолғап шеберінің жұлдызы жанатынына сенім білдіріп, сәттілік тіледі. Бекзатты баптаған Марат Жәкиевке алғысын жеткізді.

«Бүкіл қазақ елі сіздерге жеңіске жету жолында күш-қайрат пен ерік-жігер, қайсар спорттық рух тілейді! Тәуелсіздігіміздің 30 жылдығы аясында миллиондаған жанкүйердің жүрегіне Отанға, елге, жерге деген мақтаныш сезімін ұялатып, көк байрағымызды көкке көтеретіндеріңізге кәміл сенеміз! Туған елдің даңқын асырып, жаңа биіктерді бағындыруларыңызға шын жүректен тілектеспіз. Ақ жол, сәт сапар тілейміз!», - деді С.Трұмов.

Б. Нұрдәулетовтың жеке бапкері Марат Жәкиев - Қазақстанның еңбек сіңірген жаттықтырушы. Бүгінде «Astana Arlans» командасының бас бапкері болып қызмет етеді. Ол осыған дейін әлем чемпионы атанған Ердос Жаңабергенов, Олимпиада ойындарының екі дүркін күміс жүлдегері Әділбек Ниязымбетов сынды оғыландарды үлкен шаршы алаңдарға шығарып, жұлдызын жаққан жаттықтырушы.

Айта кетейік, Токиодағы Олимпиада ойындарына 206 ҰОК-тен (мемлекет) 11 090 спортшы қатысады деп жоспарланып отыр. Қазақстандық 97 спортшы 27 спорт түрінен қатысады. Бокстан жарыс 1-7 тамыз аралығында өтеді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.