Маңғыстау ауылында спорт және ойын алаңдары салынбақ

Мұнайлы ауданына қарасты Маңғыстау ауылында биыл 2 ойын алаңы және стритворкаут, спорт алаңы салынады. Бұл туралы ауыл әкімі Айдос Мейрамұлы айтты, деп хабарлайды mangystaumedia.kz сайты аудан әкімдігінің баспасөз қызметіне сілтеме жасап.

Ауыл әкімінің айтуынша, одан бөлек вокзал маңында орналасқан №4 үй жанындағы және 22 орамда орналасқан ойын алаңдарын күрделі жөндеуден өткізу, 22 орамнан емханаға дейін 1 шақырым тротуар төсеу, Маңғыстау ауылы бойынша көше жарық шамдарын орнату жоспарланған.

«Ауыл - ел бесігі» бағдарламасы аясында Маңғыстау ауылында ауылішілік жолдарды орташа жөндеу жоспарланған.

Былтыр «Ауыл – ел бесігі» бағдарламасы аясында Айрақты және Шерқала тұрғын массивтерінде қосалқы шаруашылық жерлерін электр желілерімен қамту үшін 4 КТП, 369 бағана және 9,9 шақырымды құрайтын электр желілері тартылған еді. Биыл осы тартылған желілерді іске қосып, тұрғындар игілігіне беру үшін жұмыстар жасалмақ.

Жиында аудан әкімі Ержан Күмісқалиев аталған жобаларды сапалы әрі уақытылы орындауды, әсіресе, жарықшамдарды жедел ауыстыруды, ойын алаңдарының сапасына мән беруді тапсырды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.