Костенко шахтасында қаза тапқан кеншілердің отбасыларына қандай көмек көрсетімек?

“Қарағанды облысының әкімдігі уәкілетті мемлекеттік органдармен бірлесіп, Костенко атындағы шахтада болған өрт салдарынан қаза тапқан "АрселорМиттал Теміртау" АҚ жұмысшыларының отбасы мүшелерінің тізімін жасауда, деп хабарлайды mangystaumedia.kz сайты.

Мемлекет басшысының тапсырмасына сәйкес, олардың отбасына: компания қаражаты есебінен отбасыларға баспана сатып алу, моральдық зиян үшін 10 жылдық жалақы мөлшерінде біржолғы төлем, асырауында болған балаларға 18 жасқа толғанға дейін ай сайынғы сақтандыру төлемі (ЖОО студенті болса, 23 жасқа дейін) және Мемлекеттік әлеуметтік сақтандыру қорынан жалақысына байланысты ай сайынғы төлем секілді көмек көрсетілмек. Бұдан бөлек:

– қамқорлықтағы адамдардың санына байланысты асыраушысынан айырылу жағдайы бойынша ай сайынғы мемлекеттік жәрдемақы;

– жұмыс берушінің қаражаты есебінен отбасылардың несиелерін өтеу;

– жерлеуге байланысты барлық шығындарды өтеу;

– қаза тапқандардың балалары мен жұбайларын жұмысқа орналастыру;

– 23 жасқа дейінгі балалардың оқу ақысын төлеу;

– қаза тапқандардың жұбайлары мен балаларына санаторий-курорттық емделуге жолдамалар беру;

– үйді пешпен жылытатын отбасыларға жыл сайын көмір бөлу.

Айта кетейік, Президенттің тапсырмасына сәйкес "АрселорМиттал Теміртау" АҚ-ның қаза тапқан қызметкерлерінің отбасыларына барлық қажетті көмек көрсету мәселелері ҚР Үкіметінің ерекше бақылауында болады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.