Жаңаөзен газетке жазылу науқанында белсенділік танытып отыр

Қымбатты оқырмандар!

«Газет – халықтың көзі, құлағы һәм тілі». Ұлы Ахмет Байтұрсынов айтқан осы айқындама ақпараттық қоғам қанша жерден цифрланғанымен құндылығын жойған жоқ. Өйткені, газет – жұртшылықты жағымды жаңалықтармен сүйіншілеп, руханиятқа бойлататын, билік пен халық арасын байланыстыратын құрал. Ал қажеттіліктен ешкім де бас тартпайтыны анық. Биыл жаңалық жаршысына айналған «Маңғыстау Медиа" құрамына кіретін қалалық «Жаңаөзен» газетіне – 30 жыл. Осы жылдар ішінде редакция қаншама кадрдың еңбегін шыңдаған ұстаханаға айналды десеңші?!

Ал 30 жылда басылым қаланың даму қарқынын, ел экономикасы мен әлеуметтік өсіп өркендеу, мәдениет мен оқу-ағарту, денсаулық саласындағы игі істерді жарнамалап, озаттар тәжірибесін насихаттап,әртүрлі бағыттағы тақырыптарды жазып отырды. Мұның бәрі газеттің сарғайған парақтарында сыр боп сақталды. Әр жылдардың саясаты, замана өзгерістері мен проблемалары да қатталып тұр. Газет сарғайса да, тарих жадымыздан шықпақ емес. Өйткені, ол ата-бабамыздың кешегі өткен өмірі - келешек ұрпаққа нұсқаған даңғыл жолы. Бүгінгі газет редакциясы ұжымы да заман үрдісіне сай еңбек етіп, аға ұрпақтың игі істерін жалғай берері сөзсіз. Алғашқы саны шыққаннан бастап, Тәуелсіз еліміздің талай қиын-қыстау жылдарында да оқырман газеттен қол үзген емес. Барлық шақта да халықты бірлікке, ынтымаққа бастап, олардың еңбектерін айшықтап көрсететін жергілікті басылым бүгінгі күні оқырманымен ғұмырлы. Оқырманы жоқ басылым – қанаты жоқ құспен тең. Қазір күнкөріс мәселесі алға шыққан, басылымның бағасы қалтаға салмақ түсірген кезең. Соған қарамастан, оқырман өзінің «Жаңаөзен» газетінен қол үзбей отыр.

Сондай-ақ, баспасөз науқанын жоғары деңгейде ұйымдастыра білген Жаңаөзен қаласының әкімі Мақсат Ибағаровқа, «Маңғыстау», «Огни Мангистау», «Жаңаөзен» басылымдарымен өз зейнеткерлерін қуантып, жыл сайын белсенділік танытып отыратын «Өзенмұнайгаз» АҚ бас директоры Есен Өтеевке, жұртшылықпен байланыс департаментінің директоры Әділ Сүйебайға, қалалық білім бөлімінің басшысы Ысқақ Құлатайға, «Бұрғылау» ЖШС директоры Мұстахим Беркалиевке, қалалық орталық аурухананың директоры Мұрат Сарыевке, «МұнайФильдСервис» ЖШС директоры Арман Қосқұлақовқа, коммуналдық кәсіпорын басшыларына ризашылығымды білдіремін.

Сонымен қатар 2020 жылға баспасөзге жазылу науқанында белсенділік танытып, газеттің таралымын көбейтіп отырған Жаңаөзен қаласының тұрғындарына ерекше алғысымды білдіргім келеді. Әрбір шаңыраққа денсаулық, қуаныш пен шаттық тілеймін! Айта кетейік, газетке жазылу жалғасып жатыр.

Құрметпен "Маңғыстау Медиа" ЖШС директоры Айсұлу Дутбаева

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.