Ақтауда орта білім беру ұйымдарының басшыларының форумы өтті

Бүгін Қазақстан халқы Ассамблеясы ғимаратында орта білім беру ұйымдарының басшыларына арналған «Қазіргі заманғы білім» тақырыбында форум өтті, деп хабарлайды mangystaumedia.kz.

Форумға облыс әкімінің орынбасары Гүлмира Қалмұратова, «Назарбаев Зияткерлік мектептері» ДББҰ Басқарма Төрайымы Күләш Шәмшидинова, қалалар мен аудандардың әкімдерінің орынбасарлары, Bilim Media Group электрондық білім беру компаниясының бас директоры Рауан Кенжеханұлы, облыстық мәслихат депутаттары, білім беру ұйымдарының басшылары мен педагогтары, бизнес саласы, әлеуметтік серіктестік, БАҚ, ҮЕҰ өкілдері қатысты.

Форум орта білім жүйесін дамытуға ықпал ету мақсатында білім беруді дамытуда жаңа құралдарды енгізу және тәжірибе негізінде педагог қызметкерлерді қайта даярлау мен үнемі біліктіліктерін дамыту жөнінде өткізілді.

Білім сапасының төмендеуі, әлеуметтік өзгерістердің артуы, оқушы орындарының тапшылығы туралы айтылды. Кездесуде Күләш Ноғатайқызы облыстағы орта білім беру ұйымдарында Назарбаев Зияткерлік мектептерінің озық тәжірибесін пайдалану арқылы білім сапасын көтеруге, мұғалімдердің біліктілігін арттыруға қатысты бірқатар ұсынысын жеткізді. Ал білім баласының дамуына қосқан үлесі зор ұстаздар Елбасы төсбелгісімен марапатталды.

«Маңғыстау облысы білім жүйесіне мән беріп отырғаны қуантады. Назарбаев Зияткерлік мектебі аймақтағы жалпы білім беретін орта мектептердің білім сапасын көтеруге жан-жақты қолдау көрсетуге дайын. Маңғыстау интернет жылдамдығы бойынша алдыңғы қатардағы аймақ. Бізде 1-11 сынып аралығында білім беретін тегін сайттарымыз бар. Мұғалімдерге арналған біліктілік курсын тегін өткізуге, жаңа методикалық құралдарды пайдалану дағдысын үйретуге дайынбыз», - деді Күләш Шәмшидинова.

Сонымен қатар, форум аясында облыс әкімінің орынбасары Гүлмира Қалмұратова мен «Назарбаев Зияткерлік мектептері» ДББҰ Басқарма Төрайымы Күләш Шәмшидинова «Назарбаев Зияткерлік мектептері» ДББҰ-ның «Орта білім беру жүйесінің дамуына ықпал ету Маңғыстау облысы (900 мектеп)» 2021-2022 жылдарға арналған жол картасына қол қойды.

Жол картасы аясында 2 жыл бойы 5 бағыт бойынша жұмыс атқарылмақ.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.