Отпан таудың басында бірлік оты жағылды

Бүгін Отпан таудың басында бірлік оты жағылды, деп хабарлайды mangystaumedia.kz Маңғыстау облысы әкімінің баспасөз қызметіне сілтеме жасап.

Амал келді, жыл келді! Ел Тәуелсіздігінің 30 жылдығы аясында Отпан тарихи-мәдени кешенінде ынтымақ пен бірлікке шақырар дәстүрлі мейрам – Амал мерекесі аталып өтті.

Биылғы мерекелік шара Маңғыстау облысының бас санитар дәрігерінің қаулысына сәйкес, барлық карантин талаптары сақтала отырып, шағын топпен өткізілді. Шараға Маңғыстау облысының әкімі Серікбай Трұмов, өңірдің зиялы қауым өкілдері қатысты.

Мерекелік кеш «Отпан» тарихи-мәдени кешенінің Ақсарай музейінде фотограф Серік Майемеровтың «Маңғыстаудың фотошежіресі» атты көрмесінен басталды.

Қарашаңырақ алаңында облыс әкімі Серікбай Трұмов, кешен идеясының авторы Сабыр Адай бастаған азаматтар Тәуелсіздіктің 30 жылдығына орай 30 тал екті. Бірлік пен ізгіліктің, тұрақтылық пен татулықтың белгісіне айналған Бірлік отын жағу рәсімінде өңір басшысы аталмыш мейрамның мән-мағынасына тоқталып, жиналғандарды Амал мерекесімен құттықтады.

«Былтыр әлемді шарпыған қауіпті індеттің өршуінен дәстүрге айналған «Бірлік отын» жағуға мүмкіндік болмады. Халықтың амандығы мен саулығы басты назарға алынды. Елді бірлікке шақыратын, ортақ мүддеге ұйыстыратын жақсы дәстүр үзіліп қалмас үшін биыл барлық санитарлық талаптарды сақтай отыра, шектеулі адаммен «Бірлік Отын» тұтатқалы отырмыз. Бұл - Халқымыздың бостандыққа, Еліміздің Егемендіке жету жолында жанын қиған бабалар рухына тағзым. Тәуелсіз Қазақстанның бірлігінің символы! Ежелден жаңарту мен жасампаздықтың бастауы, елдік пен бірліктің, ырыс пен берекенің арқауы болған Амал қажырлы еңбектеріңізге толағай табыс әкелсін!», - деді С.Трұмов.

Отпан таудың бауырында Бірлік оты жағылып, ақсақалдар батасын берді. Шара соңында Балықшы ата ұрпақтары Алау жағу эстафетасын Жеменей руының өкілдеріне салтанатты түрде табыстады.

Өңірдің шежірежесін фото арқылы жеткізген Серік Майемеровтың көрмесінде қойылған суреттердің түпнұсқасы:

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.