Жаңаөзенде көшеден жаңа туған нәресте табылды

Қаладағы «Рахат» шағынауданындағы көшелердің бірінен нәресте табылды, деп хабарлайды Маңғыстау облыстық денсаулық сақтау басқармасының баспасөз қызметі.

Табылған нәресте жайлы ақпарат 11 қыркүйек күні сағат 23:05-те жергілікті тұрғындардан «103» кезекші пультіне келіп түсті. Жедел жәрдем бригадасы жаңа туған нәрестені Жаңаөзен қалалық көпсалалы ауруханасына жеткізді. Баланың салмағы 2 келі 740 грамм және бойы 49 сантиметр. Ауруханаға келгенде температурасы 31 градусты көрсетіп тұрған. Кіндігі өрескел кесілген. Дереу полицияға хабарлама берілді.

«Қазіргі таңда нәресте қарқынды терапия палатасында. Баланың жағдайы тұрақты ауыр деп бағаланады. Оған ылғалданған оттегі беріліп жатыр, өздігінен дем алады, парентеральды диетада болады. Баланың қай жерде дүниеге келгені және қанша күндік екені белгісіз», – делінген хабарламада.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.