Маңғыстаулық полицейлер Конституция күнін салтанатты түрде атап өтті

Маңғыстау облысының Полиция департаментінде Қазақстан Республикасының Конституциясы күніне арналған іс-шара өтті, деп хабарлайды департаменттің баспасөз қызметі.

Полиция бастығының міндетін атқарушы Амангелді Халмұрадов ІІО жеке құрамын құттықтады.

– Маңғыстау облысы Полиция департаментінің барша ардагерлері мен қызметкерлерін, сонымен қатар, олардың отбасы мүшелерін Қазақстан Республикасының Конституциясы күнімен құттықтаймын! Қазақстан Республикасы Конституциясының маңыздылығы – ол алғаш рет адам және оның құқықтары мен бостандықтарын саяси жүйемен байланыстырды. Конституция қабылдағаннан бергі 25 жыл Қазақстанның құқықтық, зайырлы мемлекет ретінде тік тұрғанын көрсетті. Сондықтан да біз Ата заңымызды ерекше қастерлейміз. Конституциямыздың мемлекет пен қоғам үшін ғана емес, сондай-ақ жеке өзіміз, отбасымыз бен балаларымыз үшін маңыздылығын әрқайсымыздың жете бағалауымыз қажет. Сондықтан әрбір азамат конституциялық құқықтанын біліп, сол заңды ұстануы қажет.

Қымбатты әріптестер!

Тәуелсіздік жылдарында біздің Конституциямыз өзінің кемелділігін дәлелдеді. Еліміздің негізгі заңы бұрынғысынша егемен Қазақстан дамуының басты шарты болып қала береді. Конституция талаптарының орындалуы – мемлекет дамуы мен қоғамдағы азаматтық келісімнің негізі. Сіздерді Конституция күнімен шын жүректен құттықтаймын! Баршаңызға мықты денсаулық, амандық саулық, молшылық, ашық аспан мен Отанымыз – Қазақстан Республикасының гүлденуін тілеймін!, – деп құттықтау сөзінен кейін А.Халмұрадов бірқатар қызметкерлерді марапаттады.

“Құқық қорғау қызметі туралы” Қазақстан Республикасының Заңына және Қазақстан Республикасының Ішкі істер министрі Ерлан Тұрғымбаевтың бұйрығына сәйкес қызметтік міндеттерін адал атқарғаны, жұмыста жоғары нәтижелерге қол жеткізгені үшін және Қазақстан Республикасының Конституциясы күнін мерекелеуге байланысты басшы құрамның арнаулы атақтары мерзімінен бұрын берілді. “Полковник” атағына Маңғыстау облысы ПД криминалдық полиция басқармасы бастығының орынбасары Мэлис Алхамов, Жаңаөзен қаласы полиция басқармасының бастығы Айдар Қасанов, Маңғыстау облысы ПД Әкімшілік полиция басқармасы бастығының орынбасары Әлижан Мейірманов ие болды. Маңғыстау облысы Полиция департаментінің жергілікті полиция қызметі басқармасының Ерекше тапсырмалар жөніндегі аға инспекторы Ғалымжан Найзабековке “подполковник” атағы мерзімінен бұрын берілді.

Бұдан басқа, басшы құрамның атқаратын штаттық лауазымдары бойынша көзделгеннен бір саты жоғары арнаулы атақтары берілді.

Сондай-ақ, Департаменттің ардагерлер кеңесінің мүшелері де құттықтау сөз сөйледі.

Олар өз кезегінде тәртіп сақшыларының қазіргі буынына қызметтік борышын абыроймен орындап, азаматтарды қылмыстық қол сұғушылықтан қорғауды тіледі. Ардагерлер жас полицейлердің әрдайым Заңды есте сақтайтындығына сенім білдіріп, кез келген қиын жағдайда көмектесуге дайын екендерін айтты.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.