Ақтауда көркем және эстетикалық гимнастикадан қала әкімінің кубогы басталды

Ақтауда Наурыз мерекесіне орай көркем және эстетикалық гимнастикадан қала әкімінің кубогы басталды, деп хабарлайды mangystaumedia.kz.

Жарысқа Ақтау және Жаңаөзен қаласынан, Мұнайлы ауданынан 300-ден астам спортшы қатысып жатыр. Шараға Ақтау қаласының әкімі Ұлықбек Тналиев, өңірлік көркем және эстетикалық гимнастика федерациясының президенті Аида Садатқызы қатысты.

- Мемлекет басшысы Қасым-Жомарт Тоқаевтың тапсырмасына сәйкес, наурызнаманың жаңа концепциясы жасақталды. Наурызнаманың онкүндігі бойынша қаламызда бірқатар мәдени-спорттық шаралар ұйымдастырылып жатыр. Көркем гимнастика - ең әдемі спорт түрі. Жас гимнастшыларды жарыстарға дайындап жүрген жаттықтырушыларға алғысымды айтамын. Жарысқа қатысушыларға сәттілік тілеймін, - деді қала әкімі Ұлықбек Тналиев.

Жиында Ақтау қаласының спорт саласына қосқан үлесі үшін спортшылар мен жаттықтырушыларға алғыс хат табысталды. Сондай-ақ, Маңғыстау облыстық көркем және эстетикалық гимнастика федерациясының президенті Аида Садатқызы жарыс жеңімпаздары республикалық чемпионатқа жолдама алатынын атап өтті.

-Жарыс жеңімпаздары Шымкент қаласында өтетін республикалық чемпионатқа жолдама алады. Екі күнге созылатын сайыс спортшыларымыздың шыңдалуына мүмкіндік береді. Барлық қатысушыларға сәттілік тілеймін, - деді ол.

Жарысқа қатысушылардың бірі 12 жастағы Диана Советбаева. Ол көркем гимнастикамен 3 жасынан бастап айналысады.

- Мен көркем және эстетикалық гимнастиканы ерекше жақсы көремін. Бұл спортқа мені ата-анам алып келді. Көптеген облыстық және қалалық жарыстарға қатыстым, - деді Диана Советбаева.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.