Мұнайлыда 8 мобильді бригада жұмыс істейді

Бұл туралы Мұнайлы ауданы әкімінің баспасөз қызметі хабарлады.

Денсаулық сақтау министрі Алексей Цой шілденің соңына дейін елімізде мобильді бригада санын 3,5 мыңға жеткізу туралы айтты.

Аталған қызмет түрі Мұнайлы ауданда да іске қосылды. Орталық аудандық аурухана директорының міндетін атқарушы Жанар Досжанованың айтуынша, ауданда қазір 8 мобильді бригада жұмыс істейді. Олардың әрқайсысының құрамында дәрігерлер мен медбикелер қызмет етеді. Бригадалар шақырту бойынша науқастың үйіне барып, медициналық қызмет көрсетіп, дәрігерлік кеңес береді.

“Емханалар жанынан құрылған мобильді топ мүшелері науқастарға ем-дом тағайындайды. Қазір пандемияға байланысты ауырып жатқандар саны көп. Сондықтан мобильді бригадалардың санын ұлғайтуға жұмыстанудамыз. Қазіргі таңда ауданда 8 топ жұмыс жасап жатыр. Бірақ біздің ауданда халық санының көптігіне байланысты аздық етуде. Сол себепті қосымша 15 көлік бөліп отырмыз. Аудан мекемелерінің автокөліктерін осы бригада жұмысын жандандыруға ұсынып отырмыз. Халық денсаулығы басты орында болу керек”, - дейді Мұнайлы ауданының әкімі Рахат Елтизаров.

Мобильдік топ көмегіне жүгіну үшін Сall-орталығы жұмыс жасауда. Сall-орталықтарының нөмірлері әлеуметтік желілерге жарияланған-ды. Сол байланыс нөмірлеріне хабарласып, мобильдік топты өз үйіңізге шақыра аласыз.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.