Маңғыстау ауданы: Ауыз су мәселесі – басты назарда

Маңғыстау ауданының Шетпе, Жармыш және Боздақ ауылдарында ауыз су мәселесін шешу бойынша түрлі жұмыстар жүргізілуде. Бұл туралы аудан әкімі Ғ. Ниязов журналистердің қатысуымен өткен пресс-турда мәлімдеді, деп хабарлайды mangystaumedia.kz сайты.

Іс-шараға қатысушылар Боздақ елді мекеніндегі модульдік су тұшыту қондырғысының жұмысымен танысты. Мұндағы тұрғындар осыған дейін суды "Теміржолсу-Маңғыстау" ЖШС-дан алып отырған. Ал қазір осы ауылдағы жер астынан шығып жатқан тұзды суды тұшыту арқылы ауыл үйлері ауыз сумен толық қамтылмақ. Бұл қондырғыны орнату үшін жергілікті бюджеттен 92млн теңге бөлінген.

- Қондырғы құрылысы былтыр жылдың басында басталып, биыл қыркүйекте біздің баланысымызға өткізілді. Алдағы уақытта қызметкерлерге штат сұрап, қондырғыны толықтай іске қосуға жұмыстанамыз. Осы су тұшыту жұмыстарына шамамен 5 адамды жұмысқа орналастыру жоспарланған. Қондырғы қазірдің өзінде жұмыс жасап тұр, тариф құны әлі белгіленбегендіктен әзірше тегін таратылуда. Өйткені жүйе үздіксіз жұмыс жасап тұруы қажет. Бізде су тұшытатын 2 резервуар бар, әрқайсысы – 65текше метр су тұшытады. Ауыл шағын, мұнда не бәрі 17 үй. Қондырғы сағатына – 1,5 текше метр, ал күніне шамамен 20 текше метр су жинайды. Сондықтан бұл көрсеткіш тұрғындарды ауыз сумен толық қамтамасыз етуге жеткілікті,- деді «Дария» МКК директоры Нұркен Қожамбетов.

Маңғыстау ауданы әкімінің айтуынша, Жармыш тұрғындарын сумен қамтамасыз ету үшін күніне 200-250текше метр су жеткілікті. Ауылдағы су резервуары күніне 500текше метр су өндіруде. Десек те, жыл соңына дейін жаңа су құбырын іске қосу қарастырылған.

- Жаңа су құбыры арқылы Жармыш ауылы толықтай сумен қамтамасыз етіледі. Құбырдың ұзындығы – 18км, мердігер мекеме – «Көлсай Строй» ЖШС. Құрылыс жыл соңына дейін аяқталмақ,- деді Жармыш ауылының әкімі Руслан Әбішев.

Ал Шетпе тұрғындарының ауыз су мәселесін шешу үшін Ащыбұлақ, Жаңаорпа-1, Жаңаорпа-2 шағын аудандарында қазір 51шақырым су құбыры жүргізілуде. Оның өзі 2 кезеңнен тұрады. Биыл алдымен су құбыры орнатылмақ, одан кейін Қарабұлақтан 8 скважина қазылады. Содан кейін ғана Ащыбұлақ пен Жаңаорпа тұрғындарына ауыз су беріледі.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.