Тұщықұдықта түлектер ауылға кіреберіске қақпа орнатты

Маңғыстау ауданына қарасты Тұщықұдық ауылының 1977 жылы туған азаматтары мектеп бітіргендеріне 30 жыл толуына орай ауылдың кіреберісіне қақпа орнатты, деп хабарлайды mangystaumedia.kz аудан әкімдігінің баспасөз қызметіне сілтеме жасап.

Жаңадан салынған кіреберіс қақпаның биікті 8 метр, ұзындығы 13 метр. Сыртқы қасбеті ұлттық нақышта ою өрнекпен безендірілген.

Сондай-ақ Сәттіғұл Жаңғабылов атындағы мектепті бітіргеніне 10 жыл толған түлектер де туған жерді түлетуге үлестерін қосты. Олар айтулы мерекеге орай Тұщықұдық ауылындағы саябаққа стелла орнатқан. Биіктігі 3,5м таста елді мекеннің символдары бейнеленген.

Тұщықұдықта кіреберіс қақпаның ашылуы болып, ауыл аспаны әнге бөленді. Ауыл үшін аянбай, игі істің басынан табылған түлектерге ауылдастары алғыс айтып тарасты.

Айта кетейік, әр жылдары мектеп бітіргеніне бірнеше жыл болған түлектер қайырымдылық жасап, мұқтаж жандарға көмектесуі, өз ауылының көркейіп-көріктенуіне үлес қосуы дәстүрге айналды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.