Шаңырақ күні: Маңғыстауда жаңа босанған аналарға сый-құрмет көрсетілді

Бүгін Шаңырақ күніне орай Маңғыстау облыстық көпбейінді ауруханасының перинаталдық орталығында босанған аналарға естелік сыйлық табысталды, деп хабарлайды mangystaumedia.kz аурухананың баспасөз қызметіне сілтеме жасап.

Облыстық аурухана директорының м.а. Руслан Амангелдіұлы, директордың “Ана және бала істері” бойынша орынбасары Юлия Асенбаевна, бас акушер Салтанат Ибрагимовна, медициналық қызмет көрсету сапасын бақылау бөлімінің басшысы Жанар Сыдыққызы, бас медбике Айтбибі Қонарбаевна аналарды Шаңырақ күні мен келе жатқан Наурыз мерекесімен құттықтап, ізгі тілегін білдірді.

- Шаңырақ күні жас ұрпақты тәрбиелеу мәдениетін, олардың бойында патриотизм, адамгершілік пен еңбекқорлыққа деген құштарлықты қалыптастыруды насихаттайды. Сіздер, әрдайым шаңырақтың шаттығы, ұрпақтың ұлағатты болып өсуі үшін мейірім, махаббатты беруге дайын тұрасыздар. Бұл күн - ата-ана мен бала, отбасы үшін өте маңызды. Себебі шаңырағы биік, өнегелі отбасы - еліміздің іргетасы. Осы орайда сіздерге саулық, сәбиіңізге ұзақ ғұмыр тілейміз! - деді облыстық аурухана директорының м.а. Руслан Амангелдіұлы.

Перинаталдық орталықта үшінші рет босанған Рысбибі Мұхан да қуанышымен бөлісіп, дәрігерлерге алғысын айтты.

- Алладан кейін өмірімізді сақтап қалуға, сәбидің жарық дүниеге аман-есен келуіне жәрдемшісі ақ халатты абзал жандарға алғысым шексіз. Жұмыстарыңызға сәттілік, табыс, отбасыңызға амандық тілеймін, - деді ана.

Айта кетейік, Шаңырақ күні қарсаңында орталықта 8 бала дүниеге келді. Оның бесеуі ұл, үшеуі қыз.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.