Маңғыстаудың учаскелік сайлау комиссиялары дайындықты аяқтады

Маңғыстау облыстық сайлау комиссиясы учаскелердің сайлауға дайындық процесін толық бақылайды. Барлық сайлау учаскесі қажетті материалдармен қамтамасыз етілген. Сондай-ақ, мүгедектігі бар адамдар үшін жағдай жасалған, деп хабарлайды mangystaumedia.kz.

Өңірде барлығы 8 аумақтық сайлау және 243 учаскелік сайлау комиссиясы жұмыс істейді. Оның ішінде 83 сайлау учаскесі облыс орталығында орналасқан.

Сайлау комиссияларының құрамына 1 765 адам жұмылдырылды. Облыстағы сайлаушылар саны 411 103 адам.

Президенттік сайлауда дауыс бергісі келетін мүмкіндігі шектеулі жандарға арналған сайлау учаскелерінде қажетті керек-жарақтармен жабдықталған арнайы кабиналар дайындалды.

Сайлау учаскесінің мекенжайын білудің бірнеше жолы бар.

Біріншіден, сайлау учаскелерін «ЖСН бойынша іздеу» ақпараттық сервисі арқылы, сондай-ақ байланыс операторларының смс-тарату арқылы келіп түскен «109» call-орталығының қысқа нөмірі арқылы білуге болады.

Екіншіден, сіз бұл ақпаратты учаскелік сайлау комиссиясынан тұрғылықты мекен-жайыңыз туралы хабарлау арқылы біле аласыз. Үшіншіден, Kaspi.kz және Halyk мобилді қосымшалары арқылы да білуге болады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.