Маңғыстау облыстық балалар ауруханасы жыл басынан бері 60 мыңға жуық балаға медициналық қызмет көрсеткен. Биыл 9 ай есебіне сәйкес облыстық балалар ауруханасының қабылдау бөліміне 52 963 бала қаралып, тиісті медициналық көмекке жүгінген. Соның ішінде 9278 бала ауруханаға жатқызылды, ал жансақтау бөліміне 499 бала түсті. Бұл туралы Қоғамдық коммуникация орталығында өткен баспасөз мәслихатында өңірлік көпбейінді балалар ауруханасының директоры Гүлжан Ермекбаева мәлім етті деп хабарлайды mangystaumedia.kz
Спикердің айтуынша, биыл 18 жасқа дейінгі балаларға 2725 ота жасалған. Балалардың оқыс жайттар салдарынан жарақаттану деңгейі артып келеді, мәселен биыл 290 жарақат алған бала тіркелді. Соның ішінде жол – көлік оқиғасы салларынан – 152, уланудан – 75, биіктен құлаудан – 40, электрожарақат – 3, термикалық күюден – 20 бала түрлі деңгейдегі жарақат алған.
Хирургия бөліміне – 1360, педиатрияға - 1343, жүйке жүйесі бөліміне - 1140, жас нәрестелер патологиясы бөліміне- 878, оториноларингология бөліміне - 1263, травматология және ортопедия бөліміне- 1091, жұқпалы аурулар бөліміне - 2827, оңалту және қалпына келтіре емдеу бөліміне - 411 бала түскен КВИ жұқтыру дерегі бойынша 2 бала ауруханаға жатқызылған.
Халық санының өсіміне, сәйкесінше науқастар легінің көбеюіне байланысты ауруханадағы төсек орнының саны 230-ден 265-ке артты.
Штат бойынша ауруханада 60 дәрігер, 223 орта буынды медицина қызметкерлері жұмыс істейді.
Брифинг барысында спикер қазіргі таңда Маңғыстауда қызылша ауруының өршіп тұрғанын айтты. Мәселен соңғы 9 айдың қорытынды есебіне сәйкес қызылша ауруын жұқтырған 1 жасқа дейінгі 51 бала емделген. 1-3 жас аралығындағы 27, 5 жасқа дейінгі 226 балаға ем-дом жүргізілген. 5 жастан 18 жасқа дейінгі 51 бала да арнайы бөлімшеге жатқызылға. Жалпы, қорыта келгенде барлығы 277 бала ем алып шықты.
- Бұл инфекция ауа тамшылары арқылы жұғады. Сол себепті екпе алған жағдайда ғана балаларымызды қорғай аламыз. Екпе алмағанның әсерінен қызылша ауруы жаңа деңгейге көтеріліп отыр. Пандемия кезінде көптеген балалар екпе алмай қалды. Сол уақытта, егілмеген балалардың бүгінде ауруды бір-біріне жұқтыруы күрт өсуде. Осы тұрғыда, екпе алудың маңызды екенін айтқым келеді. Қазіргі таңда, инфекциялық бөлімшемізде 45 төсек орын қызылша ауруымен түскен пациенттерге арналған, -деді Гүлжан Ермекбаева.
Айта кетейік, аурухана 2022 жылдың қорытындысымен медициналық құрал – жабдықтармен 92,5% қамтылған.
- Биыл аурухана МРТ құрылғысымен толығып жатыр. Барлық бөлімшелер мен инструменталды – лабораториялық тексеру бөлімшелері бір жерде орналасқан. Білікті мамандардың да саны артып келеді. Тәжірибелі дәрігерлердің қатысуымен шеберлік сағаттарын ұйымдастырып жүрміз. 2022 жылдың наурыз айында қант диабетіне шалдыққан балалар мен олардың ата-аналарын тиісті ақпараттармен қамтамасыз етіп, білім деңгейін арттыру мақсатында «Диабет мектебі» ашылды. 2021-2023 жылдарға арналған «Жол картасы» жобасын орындау мақсатында ҚР, «Қамқорлық» қоры мен «Самұрық қазына» фонды қолдауымен «Ерте араласу» және «Қамқорлық» оңалту орталықтарын ашылды,- дейді Гүлжан Ермекбаева.
Айта кетейік, тұрғындар қандай да бір сұрақтар туындаған жағдайда 210 240 нөміріне хабарласа алады.с
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
