Жаңаөзенде карантинде жұмыс істеген букмекерлік кеңсе анықталды

Маңғыстау облысы Полиция департаменті Криминалдық полиция басқармасының қызметкерлері Жедел қимылдайтын арнайы жасағымен (СОБР) бірлесіп букмекер кеңсесінің заңсыз іс-әрекетін анықтады, – деп хабарлайды mangystaumedia.kz сайты Polisia.kz сайтына сілтеме жасап.

5 тамызда сағат 17.00-де Жаңаөзен қаласының 1 шағынауданында орналасқан “InBet” букмекерлік кеңсесі карантин шараларына қарамастан жұмыс істеген.

Полиция мекеменің екі кассирі мен келушілерін ұстады. Ішінде 28 адам болды. 39 монитор, 10 теледидар және 15 процессор тәркіленді. 30 тәртіп бұзушыға қатысты ҚР ӘҚБтК-нің 425-бабы бойынша әкімшілік хаттама толтырылды.

Олар бойынша материалдар Маңғыстау облысы бойынша санитарлық-эпидемиологиялық қадағалау департаментіне жолданды. Заңсыз қызмет фактісі бойынша материал Экономикалық тергеу департаментіне жіберілді.

Маңғыстау облысы Полиция департаментінің бастығы Жанарбек Бақтыбаев барлық азаматтарды карантин ережелерін бұзбауға, шектеу шараларын сақтауға шақырады. Өйткені, әр адамның денсаулығы өзіне байланысты.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.