«Ашық есік» күні: Ақтауда 101 адамның 17-сінен қатерлі ісік ауруы анықталды

Бүгін Ақтау қаласындағы онкологиялық диспансерінде «Ашық есік» күні өтті. Мақсат – тұрғындарды қатерлі ісік ауруынан сақтандырып, алдын алу. Осы мақсатта онкологиялық орталықта 20 кабинет жұмыс істеді, деп хабарлайды mangystaumedia.kz диспансердің баспасөз қызметіне сілтеп.

Таңғы сағат 09.00-ден бастап, түскі 13.00-ге дейін есігін айқара ашқан онкологиялық орталыққа 101 тұрғын келіп, өз денсаулығын тегін тексертіп, мамандардан ақысыз ақыл-кеңес алып үлгерді. Оның 17 адамына қатерлі ісік алды деген диагноз қойылып, 5 тұрғын осы ауруға күдікті деп танылды. Бұдан басқа 10 адамнан басқа да түрлі аурулар табылып, оларға қажетті дәрігерлік кеңестер берілді, деді диспансердің баспасөз қызметі.

Оның ішінде циталогиялық тексеруден – 74 адам, УЗИ аппаратынан – 60, маммографиядан– 31 және төмен дозалы КТ құрылғысынан– 27 адам өтіп, жалпы саны 192 тексеру тағайындалды.

Республикалық онкология және радиология ғылыми-зерттеу инситутының мәліметі бойынша, былтыр еліміз бойынша, 2035 әйелге жатыр мойыны обыры диагнозы қойылған. Жыл сайын бұл аурудан 40-44 жас аралығындағы 600-ге жуық нәзік жанды қайтыс болады екен. Мамандар қатерлі ісік дертіне жүрдім-бардым қарамай, дер кезінде медициналық тексеруден өтіп тұруға кеңес береді.

Айта кетейік, мұндай тегін тексерулер облыстық онкологиялық диспансерде тұрақты түрде ұйымдастырылып отыратындығын тұрғындардың қаперіне береміз.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.