10 сотық жер телімі барша Қазақстандықтарға тиесілі. Рас па?

WhatsApp месенджерінде тараған аудиожазбаларда әрбір қазақстандық 10 сотық жерді тегін ала алады делінген, - деп хабарлайды mangystaumedia.kz сайты.

Маңғыстау облысы жер қатынастары басқармасының басшысы Есемұрат Дүзмағамбетов Кодекстің 50-бабының 2-тармағы 2-тармақшасының талабына сәйкес, Қазақстан Республикасы азаматына жеке тұрғын үй құрылысы үшiн - 0,10 гектар(10 сотық) мөлшерде тегін берілетінін айтты. Осы заң аясында, еліміздің әрбір азаматы кез келген елді мекенде тұрғын үй құрылысы үшін жер кезегіне тұрып, 0,1 гектар (10 сотық) жерді тегін алуға мүмкіндігі бар.
Жер учаскесі бұрын тұрғын үй құрылысы үшін жер учаскесін алмаған азаматқа тиісті әкімдікте қалыптастырылған кезек бойынша бір рет беріледі,- деді жауапты өкіл.

ҚР Жер Кодексінің 44-1-бабының 8 тармағына сәйкес, жеке тұрғын үй құрылысы үшін жер учаскелері азаматтардың өтініштері негізінде есепке алынып, бөліп берілетін алаңдардың дайын болуына қарай не жеке тұрғын үй құрылысы үшін пайдаланылатын бос аумақтар бар болған кезде ғана қанағаттандырылатынын айтты.

Осы кодекстің 44 бабының 5-3 тармағына сәйкес, жеке тұрғын үй құрылысын салу үшiн жер учаскелерiн беруге су және электрмен жабдықтау желілерімен қамтамасыз етілген алаңдарда жол беріледі.

Қазіргі кезде жер кезегіне тұру электрондық үкімет порталы арқылы (E-GOV) электрондық түрде жүргізілуде.

Бұл жағдай, бұрын мемлекеттен жеке тұрғын үй құрылысы үшін жер учаскесін алмаған азаматтарға, әкімдікке бармай, қашықтан (E-GOV) порталы арқылы өтініш беріп, еліміздің кез-келген елді мекеніне жер кезегіне тұруға мүмкіндік береді.

Бүгінде Маңғыстау облысы бойынша жеке тұрғын үй құрылысы үшін жер алушылар кезегінде 205,4 мың адам кезекте тұр.

Ақтау және Жаңаөзен қалаларында жеке тұрғын үй құрылысы үшін бос алаңдар қаралмауына байланысты, аталған қалалар бойынша жеке тұрғын үй құрылысына арналған жер учаскесін беру мәселесін қанағаттандыруға мүмкіндік жоқ.

Облыс аудандарының бас жоспарларында жеке тұрғын үй құрылысы үшін 26 мың жер учаскесі қаралған. Соның ішінде, инфрақұрылыммен қамтылғандары – 2055 учаске, яғни 7,8%. Аталған учаскелер электр желісімен толықтай, газ және сумен ішінара қамтамасыз етілген.
Қазіргі кезде, облыс аумағында жеке тұрғын үй құрылысы үшін алаңдардың дайын болмауына байланысты жер учаскелері беріліп жатырған жоқ,- деді облыстық жер қатынастары басқармасы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.