72 сағаттық визасыз транзит туристер ағынын ұлғайтады

Қазақстан Республикасы Үкіметінің 2019 жылғы 30 желтоқсандағы № 1028 қаулысымен Үндістан Республикасы мен Қытай Халық Республикасының азаматтары үшін бұрын енгізілген Қазақстан Республикасына келудің, болудың және кетудің қолданыстағы визасыз жетпіс екі сағаттық режимі 2020 жылдың 31 желтоқсанына дейін ұзартылды. Бұл туралы mangystaumedia.kz сайты Мәдениет және спорт министрлігінің баспасөз қызметіне сілтеме жасай отырып хабарлайды.

Сонымен қатар, «пилоттық» режимді ұзартудан басқа қабылданған қаулы шеңберінде 2020 жылдың 1 қаңтарынан бастап енгізілген басқа да бірқатар жаңалықтар бар.

Атап айтқанда, «Атамекен» ҚР ҰКП мен тиісті әуежайлардың басқарушы компанияларының бірнеше өтініштеріне сай, сондай-ақ ҚХР мен Үндістанның бірқатар туристік компанияларының «Ұлы Жібек Жолы» бойында орналасқан қалаларға арнайы туристік бағдарламаға жоғары қызығушылық танытуына байланысты, аталған транзиттік режим шеңберінде жұмыс істейтін халықаралық әуежайлардың тізімі 4 қаланың әуежайларымен толықтырылған. Олар – Шымкент, Ақтау, Қарағанды және Тараз қалалары.

Бұдан басқа, осы визасыз режим шеңберінде қызметті жүзеге асыру және тиісті транзиттік тасымалдарды жасау құқығы мемлекет иелігіне қарамастан қазақстандық және шетелдік барлық әуекомпанияларына беріледі.

Сонымен қатар, осы режим шеңберінде келетін Үндістан мен ҚХР азаматтарына көші-қон карточкаларын беру қажеттілігі алынып тасталды. Оның орнына, 2020 жылдың 1 қаңтарынан бастап өткізу бекеттерінде Қазақстан Республикасының Мемлекеттік шекарасын кесіп өту уақыты көрсетіле отырып, Үндістан мен ҚХР транзиттік азаматтарының паспорттарына мөртабандар қойылады.

Осы шаралардың барлығы транзиттік жолаушыларға ішкі туризмді дамыту және жылжытуда өз қызметін жүзеге асыратын қазақстандық туроператорлардан қосымша турпакеттер сатып алуға мүмкіндік береді. Бұл өз кезегінде Қазақстан экономикасына шетел валютасының қосымша ағымын қамтамасыз етеді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.