103 науқасқа психологиялық кеңес берілді

Қанынан АИТВ инфекциясы табылғанын алғаш рет естіген адамның қандай күй кешетіні белгілі. Ауыр жағдайға, жазылмас дертке тап болдым деп ойлаған науқастардың көбісі күйзеліске түседі. Жылап, қобалжып, өзін-өзі жазғыруы мүмкін, үйінде жанжал тууы да ғажап емес. Мұндай қиын жағдайда адам өзін қалыпқа келтіріп, толыққанды өмір сүруін жалғастыра беруі үшін психологтың көмегі қажет көрінеді.

Бұл туралы ЖИТС-тің алдын алу және оған қарсы күрес жөніндегі облыстық орталықтың психолог маманы Гүлдана Шағадамбаева айтты.

- Психологтың негізгі мақсаты - науқасқа шешім қабылдауға, әрекет етуге, өзгертуге және өз қабілеттерін іс жүзінде жүзеге асыруға тура келетінін түсінуге көмектесу, - деді ол.

- Сондықтан психологиялық дағдарысқа тап болған науқастарға консультация барысында науқастарға ақпараттық-психологиялық қолдау көрсетіледі және позитивті өмір салтын қалыптастыру, психоэмоционалды жағдайды түзету, өзін-өзі реттеу дағдыларын қалыптастыру бағытында жұмыстар жүргізіледі. Сонымен қатар оларды тыңдап, сұрақ-жауап әдістерімен жұмыс жасалады. Психологиялық көмек көрсету барысында әдістер бірнеше салаға жіктеледі. Бұлар— ақпараттық-психологиялық қолдау көрсету; психологиялық қолдау, өзін-өзі реттеу дағдыларына қалыптастыру, психо-эмоционалды жағдайды түзету, позитивті өмір салтын қалыптастыру үшін науқасты жеке қабылдау; «Болжам-2», «Өзгерістер жоспары» әдістерімен жұмыс жасау; телефон арқылы кеңес беру; электронды форматтағы кітаптар таныстырылымы, бейне релаксациялық роликтер, үлестірме материалдар арқылы ақпараттандыру; қарым-қатынас құралдарын қолдана отырып, науқастардың біліктілігін арттыру мақсатында Whatsapp желісіндегі видео арқылы ақпараттық-психологиялық қолдау көрсету.

Г.Шағадамбаева жеткізген мәліметке сүйенсек, биыл тіркелген және де диспансерлік есепте тұрған науқастарға 103 психологиялық кеңес берілген. Бүгінде диспансерлік есепте 244 адам тіркелген. Оның ішінде ер адам саны — 167, әйел - 77, балалар - 4. Психологиялық көмек көрсету барысында антиретровирусты терапиядан бас тартып жүрген науқастарға да жүйелі түрде ақпараттық-психологиялық қолдау көрсетіледі. Сонымен қатар диспансерлік есепке тұрудан бас тартқан науқастарға да мамандармен бірге арнайы кесте бойынша іздестіру жұмыстары жүргізіледі. Ондағы мақсат — АИТВ вирусы таралуының алдын алумен қатар оны жұқтырған науқастарды қоғамдық ортадан бөлектемей, қалыпты өмір сүруге, ең бастысы, психологиялық күйзеліске ұшырамай қалыпты өмір сүруге бағыттау.

Валентина ҚОЗЫБАҚОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.